(Видео) Симонов: Државата да не заборави дека уметниците се нејзино огледало

Во време кога јавниот дискурс е пренатрупан со аларми за „криза“ во културата, актерот и режисер Јордан Симонов остро се спротивставува на ваквите перцепции. Во интервју за магазинот „Трилинг“, Симонов вели дека театарот, како жива уметничка форма, има свои циклуси на подеми и падови, но дека не е во суштинска криза – напротив, кризата е длабоко вкоренета во самото општество. Според него, вистинскиот театар не може да постои без државна поддршка, особено ако сака да игра улога на критичар и коректор на општествените девијации. Без политичка волја за културна визија, предупредува Симонов, уметноста може да се сведе на молк или пазарна забава.

„Воопшто не се сложувам со оние кои мислат дека театарот е во криза. Театарот си има свои падови и успони и нема некакви фази во кои е влезен, но дека е во криза апсолутно не се сложувам, тоа е тенденциозно, изјави во магазинот „Трилинг“, актерот Јордан Симонов.

„Театарот мора да функционира со поддршка од државата и власта. Може да функционира на некакви други постулати но тоа е веќе друг театар. Тоа е комерцијален театар кој може и сам да се финансира. Но за театар во кој улогата е коректор во општеството, да укаже на некакви девијантни појави, да укаже на некакви бави појави, да потенцира ситуации, да отвори теми кои се табу во општеството за тоа треба да биде финансиски поддржан“, вели Симонов.

Тој додава дека и дека театарот функционирал најдобро во времето на поранешната влада на Груевски.

„Свесен сум дека ако ова го кажам ќе ме „отепаат“ по портали и тн., но тогаш театарот посебно уметниците не сте свесни каков инпут добивме. Го добивме заслуженото место. Конечно тогаш некој се сети дека уметниците се битен елемент во државата и дека преку нив може разни работи да се кажат, да се потенцираат. Не сакам да навлегувам во политика а не можам ни да ја избегнам бидејќи таа е дел од живеењето. Јас се обидувам колку што можам да се затворам во мојов свет и колку што можам да не ги слушам сите работи од реалноста, затоа што апсолутно сме влезени во општо живеење преполно со фејк њуз, со вистини, лаги, со некакви вредности кои се изместени. Се обидувам колку што можам да си го затворам овој мој свет и таму да останам затоа што таму ми е некако почисто“, додава Симонов.

„Преферирам да режирам да глумам. Тоа е се исто. Да глумам во театар, да глумам на филм, тоа е целата магија. Подеднакво уживам во сите работи кои ги работам, вели Симонов и додава дека животот е глума.

„Живото е глума и сите глумат, само не се свесни за тоа. Ние со тоа работиме, нам цел живот ни е тоа – да го научиме занаетот и да копаме по внатрешноста да видиме какви несвесни подрачја во нашиов мозок има затоа што од таму може да извлечеме некакви елементи за да се направи некаква улога“, вели Симонов.

-Живееме во време на т.н лажни вести. Треба да се прави некаква дистинкција затоа што не е се вистина во тоа што ќе прочиташ и видиш на телевизија. Мислам дека сме лесно подложни на манипулации и не треба многу да го внесеш колективот во една параноја. Малку сум како парализиран е не можам да размислувам за општествениве работи, за тоа што ни се случува на микро ниво. Се помалку гледам телевизија и не сакам да влегувам во детали на приказната. Среќен ме прави мирен, стабилен живот. Во денешно време тоа е тешко возможно но ете се обидуваме колку што можеме, вели Симонов.

Целиот разговор во кој се отворија и останати теми погледнете го во видеото.