Редовен повратот на ДДВ кон стопанството, вели премиерот
Мицкоски нема информации, како што рече, дека се чека над три месеци за исплата и ги повика сите што мислат дека им се должи, слободно да му се обратат.
Премиерот Христијан Мицкоски вели дека е редовен повратот на ДДВ кон стопанството и дека нема поголеми отстапувања од она што било пракса во минатото. Тој нема информации, како што рече, дека се чека над три месеци и ги повика сите што мислат дека им се должи, слободно да му се обратат.
-Нема поголеми отстапувања од тоа што е пракса во минатото, данокот на додадена вредност се враќа редовно, но разлкиката е во тоа што сега внимателно се проверува за да не ни се случат Крмзов и слични луѓе кои го злоупотребувале и црпеле системот и ги злоупотребувале граѓаните, рече Мицкоски, одговорајќи на новинарски прашања по настанот на Царинската управа ги соопшти резултатите од сработеното.
На прашањето дека според стопанството, се чека над три месеци за исплата, тој е дециден дека апсолутно не слушнал таква информација.
-Имам редовни состаноци со стопанските комори и апсолутно не сум слушнал ваква информација. Сите што мислат дека им се должи слободно нека ми се обратат, сите го имаат мојот контакт телефон да видиме дали е тоа така, истакна премиерот.