Сиљановска Давкова: Нема потреба од предвремени избори; политички одговорно е Коцевски да се остави да работи

Претседателката Гордана Сиљановска – Давкова цени дека нема потреба од одржување предвремени парламентарни избори доколку пратениците од крилото на Алијанса за Албанците што го поддржуваат Арбен Таравари излезат од владејачката коалиција.

Говорејќи како професор, таа посочи дека дека предвремени избори се потребни во услови на парализирани институциите, кога истите не можат да функционираат или кога владејачкото мнозинството е на границата на потребните 61.

– Да, има проблеми но институциите се справуваат со нив. Ќе има редовни локални избори кои го отсликуваат расположението на граѓаните. Понекогаш се лакмус за тестирање и на успешноста на власта, но апсолутно нема потреба од парламентарни избори, рече таа одговорајќи на прашање на медиумите.

Сиљановска – Давкова уште посочи дека истите оние кои сега повикуваат на предвремени избори беа најголемите противници на предвремени избори кога навистина имаше причина за тоа.

Во врска со смената на Републичкиот обвинител, Љупчо Коцевски, изјави дека во моментов е најважно да се остави Обвинителството да работи и да се справи со трагедијата која, како што рече, „ги засега сите граѓани“.

-Мислам дека тоа е политички одговорно. Замислете ако вие после трагедија што цел живот ќе ја носиме, трагедија за која ни треба толеранција и единство за да се справиме, сега продолжите со барањето за оставка на јавниот обвинител, тогаш само ќе се комплицираат работите. Треба органот сега да се остави да работи и јас колку што гледам, постапува, рече таа.

Претседателката дополни дека и таа, како што рече имала критички забелешки и не се откажува од нив.

-Но, мислам дека во моментов е најважно секој да си ја врши својата функција и надлежност, зошто, за да можеме да се справиме со проблемот што нѐ засега сите, трагедијата нѐ засега сите. Затоа, дури и во процесуирањето на одговорните, треба многу да внимаваме, изјави Сиљановска Давкова по Свечената академија по повод 80-годишнината од кодификацијата на македонскиот стандарден јазик, што се одржа денеска во МАНУ.

По трагедијата што се случи во дискотеката „Пулс“ во Кочани, во која животот го загубија 62 лица, премиерот Христијан Мицкоски најави запирање на постапката за разрешување на јавниот обвинител, Љупчо Коцевски, со оглед на обемната истрага која што се води во врска со случајот.