Романската полиција изврши претрес во домови поврзани со Георгеску

Романската полиција денеска изврши претрес на неколку домови како дел од истрага за наводни нерегуларности при победата на крајнодесничарскиот кандидат за претседател Калин Георгеску. Тој победи во првиот круг од претседателските избори, кои вчера беа поништени од Уставниот суд.

Судот донесе одлука за поништување на изборите поради масивна дезинформациска кампања, наводно поттикната од Русија, што резултираше со искривување на изборните резултати. Романските власти почнаа истрага по доставените информации од разузнавачките служби за мешање од странска држава.

Претресите се спроведени во три куќи во градот Брашов во централна Романија, при што се истражуваат случаи на „корупција на гласачите, перење пари и компјутерска измама,“ според обвинителството.

Информациите презентирани од романските разузнавачки служби откриваат дека кампањата на Георгеску на социјалната мрежа ТикТок чинела еден милион евра, иако тој тврди дека не потрошил ништо. Документите сугерираат и директна интервенција од страна на странска држава врз информатичките и комуникациските системи поврзани со изборниот процес.

Во меѓувреме, романската Дирекција за истрага на организиран криминал и тероризам (DIICOT) отвори кривична постапка за кампањата на Георгеску, што засега не подразбира формално обвинение, туку собирање докази за понатамошни чекори.

Романските служби предупредија дека земјата била цел на „агресивни руски хибридни напади“ за време на првиот круг од претседателските избори.