Претседателот на ДПА, Мендух Тачи, денеска и официјално го напуштил „Европскиот фронт“ предводен од ДУИ и Али Ахмети, објави порталот „Тетова сот“, повикувајќи се на партиски извори.
Тоа го потврдиле и од партијата на Тачи, ДПА, нагласувајќи дека ќе останат во комуникација само со лидерот на ДУИ, Али Ахмети.
„Да, нашиот лидер го напушти Европскиот фронт и веќе нема фронт, претседателот ќе има комуникација само со лидерот на ДУИ, Али Ахмети“, велат од ДПА, нагласувајќи дека нивниот лидер наскоро во јавноста ќе ги објасни причините за напуштањето на Европскиот фронт.
Наспроти ова, Ахмети денеска уверуваше дека Мендух Тачи е усогласен со Европскиот фронт. Двајцата политичари-ветерани во минатото беа жестоки противници во политичкиот блок на македонските Албанци, но партијата на Тачи во последните години стана маргинален субјект на политичката сцена. На последните избори, Тачи му се приклучи на „Европскиот фронт“ предводен од ДУИ.
Тачи беше кандидат за пратеник во изборната листа број 6, каде што беше избран во Собранието. По неговото заминување, Европскиот фронт останува со 17 пратеници.