Џудо тренерот, прилепчанецот Рубин Пеески (47) е осуден на 20 години затвор поради обљуба на четири девојчиња на кои тој им бил тренер.
Портпаролот на прилепскиот Основен суд Жарко Велески информираше дека на Пеески му е изречена и забрана за вршење професија, дејност, од 10 години.
„Осуден е за две продолжени кривични дела – обљуба со злоупотреба на положбата по член 198, став 2 во врска со став 1 и во врска со член 45, став 1, од Казнениот законик, како и за две кривични дела обљуба со злоупотреба на положбата по член 189 став 2 во врска со став 1 од КЗ. Осуден е на единствена казна затвор од 20 години. Исто така, му е изречена забрана за вршење професија, дејност во траење од 10 години“ – изјави Велески.
Според обвинението, Пеески во текот на 2020 година во Прилеп и на други места, заради задоволување полови страсти, со злоупотреба на својата положба, извршил полови дејства врз деца кои наполниле 14 години.
Станува збор за 4 девојчиња, ученички на кои им бил тренер.
За случајот јавноста дозна во почетокот на минатата година кога еден од родителите го пријавил тренерот во полицијата.