Регионот на Западна Африка историски гледано се соочува со најголем недостиг на храна, поттикнат од регионалните конфликти, сушата, но и влијанието на украинската војна врз цените и достапноста на храната, соопштија хуманитарните агенции.
Во овој регион има околу 27 милиони гладни, а тој број до јуни би можел да се зголеми на 38 милиони, што е за 40% повеќе од минатата година и историски максимум, се наведува во заедничката изјава на 11 меѓународни хуманитарни организации.
Големи делови од Западна Африка, вклучително и делови од Буркина Фасо, Мали, Нигер и Нигерија, се соочуваат со исламистички бунт поради кој досега се протерани милиони луѓе.
Заедно со Чад тоа се земјите најпогодени од глад.
Регионот се соочува и со големи поплави и суши поради климатските промени, што ја отежнува работата на земјоделците.
Цената на храната на светско ниво расте, трговијата е нарушена поради руската инвазија на Украина, а негативно влијаеа и затворањата на границите поради коронавирусот.