Најскапата слика во историјата ќе заврши во новиот музеј во Саудиска Арабија

„Салватор Мунди“, најскапата слика во историјата на светот, која му се припишува на Леонардо да Винчи, ќе заврши во центарот на новиот музеј во Саудиска Арабија, открива новиот документарен филм на Би-би-си во два дела за саудискиот престолонаследник Мохамед бин Салман кој во 2017 година го купи ренесансното дело на аукција во галеријата Кристи во Њујорк за рекордни 450 милиони долари.

Сликата не е јавно видена откако е продадена на аукција, а според Би-би-си, можно е делото да се наоѓа во магацин во Женева, пренесува Art News.

Добрата вест е дека нејзиниот сопственик, престолонаследникот на Саудиска Арабија, би можел да го направи делото достапно на јавноста во иден музеј во Ријад, каде сликата ќе служи како „културно сидро“, слично на Мона Лиза во Лувр.

Со години се мислеше дека сликата „Салватор Мунди“ е на јахтата на Бин Салман, но Бернард Хекел, професор по блискоисточни студии на Универзитетот Принстон, за Би-Би-Си изјави дека сликата се чува во Женева.

Припишувањето на „Салватор Мунди“ на Леонардо е предмет на интензивна дебата во светот на уметноста.

Некои експерти тврдат дека стилот на сликата не е во согласност со познатите дела на Леонардо, особено во однос на пропорциите на фигурата и цртите на лицето.

Сликата претрпе значителна реставрација, што ја доведува во прашање автентичноста на основните слоеви и детали.