Американскиот претседател Џо Бајден рече дека згрешил што ги охрабрил своите поддржувачи да го направат Доналд Трамп своја „мета“, додавајќи дека тој не е оној кој користи воспалителен јазик, туку неговиот ривал.
На 8 јули, Бајден разговараше со некои од неговите најголеми донатори и рече дека треба да го префрлат фокусот на кампањата од него на неговиот ривал.
– Имам една работа, а тоа е да го поразам Доналд Трамп… Завршивме со разговорот за дебатата. Време е Трамп да биде наша мета – изјави Бајден во таа ситуација.
Некои републиканци го обвинија Бајден за создавање клима што доведе до обид за убиство на Трамп на митинг во Пенсилванија во саботата, додека самиот американски претседател постојано го осудува политичкото насилство.
– Беше грешка да се користи тој збор – рече Бајден во интервју за „Ен-Би-Си“.
– Мислев да се фокусирам на тоа, да се фокусирам на тоа што го прави – рече тој.
Соочувајќи се со повици од својата партија да се повлече како кандидат, Бајден се обиде да го префрли вниманието од неговите лоши перформанси на неговиот противник, истакнувајќи ја неговата улога во нападот на Капитол на 6 јануари 2021 година.
– Јас не сум типот што првиот ден рече дека сака да биде диктатор. Јас не сум типот што одби да го прифати исходот од изборите – рече Бајден.
Тој истакна дека Трамп се вклучил во таква реторика, наведувајќи ги коментарите на неговиот ривал за крвопролевање.