Светска банка ги зголеми изгледите за глобалниот економски раст на 2,6 отсто за годинава

Светска банка ја зголеми прогнозата за светскиот економски раст, оценувајќи дека оваа година ќе изнесува 2,6 отсто, поддржан од растот на САД. Тоа е повисоко од глобалниот раст од 2,4 отсто за 2024 година што Светска банка го предвиде во претходната прогноза во јануари.

Таа предвидува дека економскиот раст во светот годинава ќе биде ист како и во 2023 година, односно 2,6 отсто. Банката предупреди дека растот е сè уште бавен според минатите стандарди и дека најсиромашните земји се борат под тежината на високите долгови и високите каматни стапки, како и дека зголемените трговски бариери го загрозуваат просперитетот ширум светот.

Војните во Украина и Газа извршија дополнителен притисок врз регионалните економии, оценува Светска банка, пренесува Бета.

Посилниот од очекуваниот раст на САД, најголемата светска економија, придонесе за 80 отсто за зголемените изгледи за глобален раст на Светска банка. Светската банка сега предвидува дека американската економија ќе порасне за 2,5 отсто во 2024 година, исто како и во 2023 година, но значително повеќе од 1,6 отсто што Банката ги предвиде во јануари.
Светската банка, која е составена од 189 земји-членки, се стреми да ја намали сиромаштијата и да го подигне животниот стандард преку обезбедување грантови и заеми со ниски каматни стапки за економиите во развој.