Пресудата со која Љупчо Пецов е огласен за виновен е правосилна од 21 септември 2026 година, откако странките не вложиле жалба, информираат од Кривичниот суд.
Пресудата била донесена на 24 август годинава врз основа на признание на вина од страна на обвинетиот.
Со неа, на Пецов му е утврдена казна затвор во траење од две години, која нема да биде извршена доколку во рок од пет години не стори ново кривично дело.
Покрај условната затворска казна, на обвинетиот му е изречена и парична казна во износ од 8.000 евра.
Судот изрекол и споредна казна – забрана за вршење дејност како основач или управител на правно лице, односно забрана да управува, раководи или располага со имот на правно лице, во траење од десет години.
Казна е изречена и на обвинетото правно лице ДУТУД А.К.А.П. ДООЕЛ, кое се наоѓа во стечај. На правното лице му е изречена парична казна од еден милион денари.
Дополнително, изречени му се и забрани за добивање дозвола, лиценца и концесија утврдени со посебен закон, забрана за учество во постапка за јавен повик, како и забрана за основање нови правни лица. Сите овие забрани се во траење од пет години.
Од Кривичниот суд посочуваат дека при определувањето на казната била земена предвид и потребата од обезбедување процесна избалансираност во однос на останатите обвинети во комплексниот кривично-правен случај.
Како што наведуваат од судот, и други обвинети ја признале вината, ја надоместиле паричната штета, а во раздвоените постапки им биле изречени алтернативни мерки.
Пресудата во моментов е во фаза на анонимизација и, според најавата од судот, наскоро ќе биде јавно достапна.
Ѓаволот првично беше дел од кривичната постапка што се водеше за случајот „Синџир“, избега додека се водеше истрагата за него, го пријави својот адвокат Фехми Стафа дека му барал поткуп и беше фатен на дело како зема 30 илјади евра од сестрата на Ѓаволот, пишува „Слободен печат“.
Стафа доцна вчера се спогоди со Обвинителството, судот ја прифати спогодбата и му одреди затворска казна од една година и три месеци. Стафа барал 100 илјади евра, а зел половина, со ветување дека ќе му издејствува судијата Ѓоко Ристов да му изрече поблага мерка на Ѓаволот, кој тогаш беше во бегство.
Парите не стигнаа до Ристов, Обвинителството почна истрага и покрена обвинение притив него откако најде 350 илјади евра соѕидани во кујната од домот на родителите на Ристов во Неготино. За него во тек е судскиот процес. Пред два дена пак се предал и Стојан Чифлигароски, битолски бизнисмен кој е осомничен дека бил главата на „Синџирот“.