Американскиот претседател Доналд Трамп отворено повика на промена во украинското раководство, велејќи дека е време Украина да добие нов претседател наместо Володимир Зеленски.
Тој ја даде изјавата пред новинарите во Белата куќа, во време на зголемени тензии меѓу Вашингтон и Киев поради американскиот договор со Русија за испорака на дизел, пренесува АП.
„Знаете што предлагам? Предлагам да добијат нов лидер кој би можел да склучи договор. Бидејќи тој би можел да склучи многу договори, но од некоја причина никогаш не го прави тоа. Мислам дека е време Украина да добие нов претседател“, рече Трамп.
Трамп го критикуваше и Зеленски за украинските напади врз руските рафинерии, кои влијаеја на глобалното снабдување со дизел.
„Им рековме: „Можете да правите што сакате со Русија, но не ги напаѓајте рафинериите затоа што создавате проблем за целиот свет“, рече Трамп.
Тој го обвини Зеленски дека со своите постапки предизвикува проблеми за други земји, вклучително и за САД.
„Тој сака да предизвика проблеми за целиот свет. Сака да предизвика проблеми за нашите земјоделци и сточари поради дизел горивото, бидејќи Русија снабдува голем дел од светот со дизел“, рече тој.
Тој повтори дека ја предупредил Украина да не ја напаѓа руската нафтена инфраструктура.
„Им рековме: „Правете што сакате, но не го напаѓајте снабдувањето со дизел бидејќи има голем проблем, голем недостиг“. И што направи тој? Тој отиде и го нападна тоа“, рече Трамп.
Конечно, тој упати строго предупредување до Зеленски.
„Подобро да престане“, рече американскиот претседател.
Зборувајќи за последиците од конфликтот, Трамп истакна дека Зеленски изгубил триесет проценти од територијата на неговата земја и дека повеќе од два милиони луѓе биле убиени од двете страни.
Американскиот претседател со тоа повторно ја доведе во прашање подготвеноста на Зеленски да постигне договор што ќе ја заврши војната со Русија.
Изјавите на Трамп доаѓаат откако вчера тој објави договор со рускиот претседател Владимир Путин за испорака на големи количини руски дизел на светскиот пазар. Со овој потег Вашингтон се обидува да го ублажи поскапувањето на горивата, кои дополнително пораснаа поради војната со Иран.
Според најавата на Трамп, Русија треба веднаш да испорача повеќе од 300.000 тони дизел, а потоа дополнителни 500.000 тони во ноември и милион тони потоа. Најавени се и дополнителни испораки.
Зеленски остро го критикуваше договорот, предупредувајќи дека дополнителните приходи од продажбата на руските енергетски производи ќе и овозможат на Москва да ја продолжи војната.
„Денеска Русија се заблагодари за укинувањето на санкциите за извоз на дизел со фрлање пет наводни бомби врз станбени згради во Запорожје“, напиша денеска Зеленски на социјалната мрежа Х.
Најмалку 20 лица, меѓу кои три деца, загинаа во руските напади врз Запорожје, јави Асошиејтед прес, повикувајќи се на украинските власти.
Зеленски рече дека Москва го толкува секое ублажување на меѓународниот притисок како дозвола за продолжување на нападите на украинските градови.
Американскиот „Аксиос“ денеска објави дека Трамп одлучил да се договори со Путин, откако Зеленски игнорирал најмалку шест американски барања да престане да ги напаѓа руските рафинерии.
Според американски функционер запознаен со разговорите, Трамп верува дека нападите на Украина врз руската нафтена инфраструктура дополнително ги зголемуваат цените на горивото во САД.
„Зеленски погрешно ја проценува ситуацијата. Продолжувајќи да ги напаѓа рафинериите, тој ја уништува добрата волја што ја изгради со Трамп во последните шест месеци“, изјави американски претставник за Аксиос.
Според истиот извор, Зеленски бил подготвен да ги запре нападите врз руските рафинерии доколку Русија во исто време престане да ги напаѓа украинските електрани. Трамп, сепак, побара унилатерален крај на украинските напади.
Тензиите избувнаа и за време на вчерашните преговори во Мајами, каде што претставниците на Трамп, Стив Виткоф и Џаред Кушнер се сретнаа со украински и европски претставници.
Според украински функционер посочен од Аксиос, американските претставници предупредија дека Вашингтон би можел да го прекине споделувањето разузнавачки информации со Украина доколку Киев продолжи да ги игнорира барањата за прекин на нападите врз руските рафинерии.
Американски официјален претставник негираше дека била упатена таква закана. Преговорите инаку беа фокусирани на безбедносните гаранции за Украина, можните територијални решенија и обновата на земјата по завршувањето на војната.
Зеленски рече дека украинската делегација не била однапред информирана за американско-рускиот договор за дизелот.
И покрај договорот на Трамп со Москва, сè уште нема потврда дека Русија е подготвена да ги продолжи преговорите за ставање крај на војната.
Според советникот на Путин, Јуриј Ушаков, за време на 90-минутниот телефонски разговор со Трамп, рускиот претседател не се согласил на итно продолжување на преговорите со Украина.
Ушаков рече дека Москва допрва ќе размисли кога би можеле да продолжат преговорите.
Во исто време, европските земји ја изразија својата загриженост за олеснување на американските санкции за руските производители на енергија. Германија и Шведска истакнаа дека остануваат посветени на санкциите против Русија.
Така, повикот на Трамп за промена на украинскиот претседател доаѓа во време кога односите меѓу Вашингтон и Киев повторно се заоструваат, додека војната, која започна со руската инвазија во февруари 2022 година, продолжува.