Одземена е лиценцата на „Беса Травел“, потврди Бектеши

Министерството за економија денеска ја одземало лиценцата на туристичката агенција „Беса Травел“ – напиша на ФБ министерот Бектеши.

„По барање на Министерството за економија, Државниот пазарен инспекторат има извршено три вонредни инспекциски надзори во просториите на субјектот ДТППУ БЕСА ТРАНС БТБ ДООЕЛ експорт –импорт со адреса: село Рашче, Општина Сарај – Скопје, подружница БЕСА ТРАВЕЛ со адреса улица Стив Наумов број 2/2-3 Скопје, при што е констатирано дека истиот не обавува дејност, односно не работи. Државниот пазарен инспекторат, постапувајќи по наше барање, има доставено известување бр. 09-26-51 од 11.01.2021 година со кое информира дека правниот субјект не обавува дејност, односно канцелариите се затворени и во истите не може да се изврши инспекциски надзор па како министер за економија донесов решение за одземање на лиценцата“ напиша Бектеши на Фејсбук.

Од Министерството ги повикаа сите граѓани да проверат со кои туристички агенции патуваат и дали истите имаат важечки лиценци за работа издадени од Министерството за економија.