Мицкоски: Владата како да се плаши од Делчев, сака да се додвори на источниот сосед, на сопствена штета!

„Досега немало сериозна понуда од власта за вклучување на опозицијата во преговорите со Бугарија“. Ова во интервју за „Дојче веле“ го изјави претседателот на опозициската ВМРО-ДПМНЕ – Христијан Мицкоски кој вели дека е подготвен да разговара за секое прашање, но само ако постои заедничка согласност за зачувување на македонските идентитетски линии

Сето тоа се актуелизира по одбележувањето на 150-годишнината од раѓањето на Гоце Делчев и предлог-декларацијата на пратениците на ВМРО-ДПМНЕ, со која бараат да се афирмира заштита на ликот и делото на македонскиот револуционер, предлог кој владејачкиот СДСМ го одби.

„Гоце Делчев воопшто не е предмет на преговори и Владата смета дека е непотребно донесување ваква декларација” – изјавија од Владата.

Мицкоски вели дека досега не добиле сериозна понуда за вклучување во преговорите со Бугарија, а тој е подготвен да разговара за секое прашање.

„Досега немало сериозна понуда од власта за вклучување на опозицијата во преговорите со Бугарија. Ниту пак Владата најде за потребно да информира за содржината на разговорите. Дополнително главните информации се добиваат од медиумите што говори за две работи, или несериозно се пристапува кон вака еден сериозен процес, или владата крие нешто од јавноста што е штетно за државата. Содржината на разговорите и одговорите на прашалникот ‘пет плус еден’ од неразбирливи причини е тајна, а нашите информации говорат дека со него сериозно се нарушува идентитетската линија која мора да се сочува. Дополнително, Владата како да се плаши од Делчев и на тој неразбирлив начин сака да се додвори на источниот сосед, на сопствена штета. Јас сум подготвен да разговарам за секое прашање, но само доколку сите заеднички се согласиме дека мора да ги зачуваме нашите идентитетски линии и стратешки интереси“ – рече Мицкоски за ДВ.