МЗ: Чесно е Димитров да каже дека на повеќето седници за ковид мерките не присуствуваше

Министерството за здравство преку соопштение изнесува дека се изненадени од, како што велат, непромислената изјава на вицепремиерот Никола Димитров, со која покажува значителна несериозност кон ковид пандемијата.

Вицепремиерот денеска на прес-конференција истакна дека неговите позиции во Владата „во однос на колегите биле различни на многу теми, како и приодот и мерките против пандемијата“.

„Чесно е Димитров, да каже дека на многу седници на ГККШ или на Владата кога на дневен ред беа токму тие точки, тој не ни присуствуваше, туку на седниците го заменуваше државниот секретар. Кога седниците пак беа „удостоени“ со присуството на вицепремиерот, тој во ниту еден момент не се спротивстави на препораките и на мислењата на стручната лекарска фела која до Владата препорачуваше и советуваше во кои насоки да се движат мерките за заштита од ширење на Ковид 19. Димитров, апсолутно го делеше мислењето со колегите“ се вели во соопштението на МЗ.

Од Министерството потенцираат дека „неразбирливи се причините поради кои Димитров истапува во јавноста со вакви ставови“.