Лавров: Русија е подготвена за преговори со Киев, но не се согласува со прекин на борбите

Русија е подготвена да разговара со Украина, но нема да ги прекине воените операции додека траат евентуалните преговори, изјави рускиот министер за надворешни работи Сергеј Лавров, пренесе руската државна новинска агенција ТАСС.

Лавров ја даде изјавата на маргините на самитот на БРИКС во Њу Делхи, групација која Москва ја смета за важна противтежа на западните земји.

„Остануваме подготвени за преговори, но воените операции нема да бидат суспендирани за време на разговорите“, изјави Лавров.

Тој истакна дека Москва покажала подготвеност за разговори со Киев и повторно ја спомена можноста за директна средба во Москва, повикувајќи го украинскиот претседател Володимир Зеленски да дојде во руската престолнина.

„Ако сака да се сретнеме, нека дојде“, рече Лавров, оценувајќи дека евентуалното доаѓање на Зеленски во Москва би претставувало „голем знак на добра волја“ од руска страна.

Зеленски претходно го отфрли предлогот за средба во Москва, кој рускиот претседател Владимир Путин го изнесе пред неколку месеци.

Во меѓувреме, Соединетите Американски Држави настојуваат повторно да ги придвижат преговорите меѓу Москва и Киев. Во дипломатските кругови во изминатиот период се разгледуваше и можноста за трилатерална средба на Путин, Зеленски и американскиот претседател Доналд Трамп.

Засега, сепак, нема договор за одржување таков самит, а Москва и Киев и натаму имаат значителни разлики околу условите за завршување на војната.