Уставните измени нема да се одложат. Со формирањето на експертската група и со нивната работа практично ќе започне процесот, кој потоа нормално ќе влезе во процедурите кои се пропишани со закон, изјави денеска премиерот Димитар Ковачевски по посетата на фирмата „Везе Шари“.
„Јас верувам дека нашата држава има капацитет, пред се, демократски, меѓутоа и европски капацитет и визија и оваа одлука за продолжување на нашиот европски пат нема да биде заложник на личната кариера на само еден човек во државата, а којшто е подготвен заради својата лична фотелја да ризикува прекинување на еден процес којшто значи обезбедување на полноправно членство во ЕУ кое со себе носи зголемени инвестии, плати, повисок животен стандард за граѓаните, врвни институции, врвно европско законодавство, тука во нашата држава бидејќи нашите граѓани сакаат и заслужуваат да живеат во ЕУ, но тука во својата држава а не во туѓина“ – рече Ковачевски.
Тој сепак не одговори кога ќе биде формирана Комисијата која ќе работи на уставните измени.
Премиерот рече дека тимот за подготовка на уставните амандмани ќе биде формиран во Министерството за правда и дека во него ќе членуваат врвни експерти од областа уставното право и правото и претставници на политичките партии бидејќи за овој процес е потребен широк политички и општествен консензус.