Претседателот на Украина – Володимир Зеленски изјави оти верува дека руски диверзантски групи влегле во украинскиот главен град Киев.
„Според нашите информации, непријателот ме означил како цел број 1, моето семејство како цел број 2. Тие сакаат политички да ја уништат Украина со уништување на шефот на државата. Имаме информации дека непријателски диверзантски групи влегле во Киев“ – рече тој во видео објавено доцна синоќа.
„Останувам во владиниот кварт заедно со другите“ – додаде Зеленски.
Утринава тој изјави дека Русија продолжува со ракетните напади врз Украина, но дека нејзините војници се запрени да напредуваат во повеќето правци.
Во телевизиско обраќање, Зеленски рече дека руските напади биле насочени и кон воени и кон цивилни цели.
„Целта на овој напад е притисок. Притисок врз вас драги граѓани. Притисок врз целото наше општество. Нагласувам: не само врз властите, туку и врз сите Украинци“ – рече Зеленски.
Тој додаде дека нападот го потсетил на нападот на Киев во 1941 година.
„Ние сами си ја браниме државата. Најмоќните сили во светот гледаат од далеку. Дали вчерашните санкции ја убедија Русија? Слушаме на нашето небо и слушаме во нашата земја дека тоа не е доволно“ – нагласи Зеленски.
Според него, Русија ќе мора да разговара „порано или подоцна“.