Претседателот на Украина – Володимир Зеленски ја обвини Москва дека прибегнува кон „нуклеарен терор“ и дека сака да ја „повтори“ катастрофата во Чернобил, откако нагласи дека руските сили утринава нападнале нуклеарна централа.
Тој упати повик до светските лидери да се разбудат и да ја спречат Европа „да умре од нуклеарна катастрофа“ откако најголемата централа на континентот се запали откако беше гранатирана.
„Ниту една земја освен Русија никогаш не пукала врз објекти за нуклеарна енергија. Ова е првпат во нашата историја. Во историјата на човештвото. Терористичката држава сега прибегна кон нуклеарен терор“ – порача Зеленски.
АЕЦ во Запорожје, индустриски град на југоисток, обезбедува околу 40 отсто од нуклеарната енергија во државата и, според Зеленски, таму има 6 од 15-те реактори во Украина.
Официјален Киев соопшти дека пожарот започнал откако руските војници пукале врз објектот.