Во акција на македонската и косовската полиција уапсен е фалсификатор на монети

На косовската територија, вчера е приведено лицето Ш.Д., на 34-годишна возраст од Ресен, вработено во Одделот за сузбивање на организиран и сериозен криминал при Министерството за внатрешни работи, а поради постоење основано сомнение за сторено кривично дело – „фалсификување пари“, соопштија вечерва од МВР.

Поради регистрирани неколку случаи на пуштање во оптек на фалсификувани пари во Косово, Специјалното јавно обвинителство на Република Косово (СПРК) заедно со Секторот за истражување економски криминал и корупција во косовската полиција, со поддршка на други истражни и разузнавачки органи во таа држава, од 2023 година започнаа повеќе активности насочени кон спречување на дистрибуцијата на фалсификувани пари, особено евра на косовскиот пазар со што се нарушуваше пазарот и јавниот интерес.

Како резултат на овие активности, започна голема меѓународна истрага во рамките на која беше формиран Заеднички истражен тим меѓу Косовското специјално обвинителство од една страна и Основното јавно обвинителство Скопје од друга страна. Во спроведување на активностите на истражниот тим беа вклучени претставници на Истражниот центар на ОЈО Скопје, на Одделот за борба против организиран и сериозен криминал, Единица за финансиски криминал при Министерството за внатрешни работи на Македонија и на Директоратот за економски криминал при косовската полиција.

Работејќи заедно тие реализираа операција во која на 4 август во Косово беше уапсен еден државјанин на Македонија за кого постои сомнение дека произведувал и пуштал во оптек во Косово стотици илјади фалсификувани метални евромонети во номинална вредност од по 2 евра. Во исто време, во Скопје беа извршени претреси на три локации при што беа пронајдени и запленети машини за фалсификување на евромонети, готови и полуготови фалсификувани монети, калапи и материјали потребни за изработка на монетите.

Сите тие ќе бидат предмет на натамошно вештачење.