„Нема да опстане“: Зеленски најави дека Кримскиот мост ќе биде целосно уништен

Керченскиот мост, кој ја чинеше Русија 3,5 милијарди долари и стана симбол на владеењето на Владимир Путин по анексијата на Крим, е делумно уништен од украинските напади и нема да опстане, изјави украинскиот претседател Володимир Зеленски. „Русија незаконски го изгради овој мост на нашата привремено окупирана територија.

Ова е целосно непочитување на територијалниот интегритет и суверенитет. Токму тоа е она што тој [рускиот претседател] почна да го прави по 2014 година. Затоа, ние ќе одговориме на неговите напади врз нашите мостови. И тој мора да разбере дека овој мост, во секој случај, нема да опстане. Ова е прашање за нас, за нашите сили – сега, за време на војната, или подоцна, кога војната ќе заврши“, рече Зеленски во интервју за Ен-Би-Си.

Според претседателот, Кримскиот мост е легитимна цел за украинските напади, бидејќи Киев одговара на агресијата на Москва. „Нашето правило е многу едноставно: ние возвраќаме. Ако ја нападнат нашата енергетска инфраструктура – ​​а тоа се случува постојано – ние бараме начини да одговориме… Тие нè напаѓаат со години – уништуваат мостови (што многумина веќе го заборавиле), железнички линии и така натаму… Русија мора да почувствува што е војна“, нагласи тој. Во периодот меѓу 16 и 19 ноември, Украина изврши три напади врз Кримскиот мост. Вториот напад, во ноќта на 17 ноември, беше најразорен; притоа, како резултат на удари од ракети и дронови, се урнаа лакот на мостот и 270 метри од коловозот, паѓајќи во водите на Керченскиот теснец.

Останатите делови од конструкцијата го блокираа поморскиот сообраќај под мостот. Коментирајќи ја операцијата, украинската страна истакна дека во нападот првенствено биле користени ракети и дронови од домашно производство, а не бил употребен сателитскиот комуникациски систем „Старлинк“ или „Старшилд“ на Илон Маск. Во нападот беше погоден и лакот на железничкиот мост, кој претрпе оштетувања, но сепак не се урна.