Зошто центрите за податоци со вештачка интелигенција се борат да стигнат до земјите во развој: Недостаток на електрична енергија, персонал и капитал
Претседателот на Светската банка, Аџај Банга, изјави дека во моментов не постои реална перспектива за масовно проширување на центрите за податоци за вештачка интелигенција (АИ) на пазарите во развој. Тој истакна дека насочувањето на и онака оскудните енергетски ресурси кон АИ-системите би било несоодветно и штетно за тие држави.
Претседателот на Светската банка, Аџај Банга, изјави дека во моментов не постои реална перспектива за масовно проширување на центрите за податоци за вештачка интелигенција (АИ) на пазарите во развој. Тој истакна дека насочувањето на и онака оскудните енергетски ресурси кон АИ-системите би било несоодветно и штетно за тие држави.
Зборувајќи на панел-дискусијата во организација на „Блумберг“ за време на Неделата на климата во Њујорк, Банга објасни дека изградбата и функционирањето на овие центри бараат гигантски компјутерски капацитети и огромни количини електрична енергија – кои во одредени случаи ги надминуваат дури и вкупните потреби на некои развиени нации.
Кои се главните пречки за земјите во развој?
Покрај потребата од апсолутно стабилна енергетска мрежа, првиот човек на Светската банка посочи уште неколку клучни пречки со кои се соочуваат неразвиените пазари:
Проток на податоци: Односно потребата од масовен, слободен и непречен проток на информации.
Човечки капитал: Недостиг од високообучен стручен кадар кој длабоко ја разбира практичната примена на оваа технологија.
Огромни финансиски средства: Потреба од значителен капитал за првична инвестиција и одржување – услов што многу мал број од овие земји можат да го исполнат.
Изјавите на Банга доаѓаат во време кога на глобално ниво се води сè пожешка дебата за влијанието на брзиот развој на вештачката интелигенција врз животната средина и одржливоста на енергетските системи.
Потрошувачката на струја ќе се удвои до 2030 година
Според прогнозите на Меѓународната агенција за енергија (ИЕА), потрошувачката на електрична енергија во центрите за податоци ќе се удвои до крајот на оваа деценија. Со тоа, овие објекти до 2030 година ќе опфаќаат дури 3 проценти од вкупната глобална побарувачка за струја.
Масовната изградба на инфраструктура за вештачка интелигенција веќе предизвикува незадоволство и кај јавноста во развиените земји. Локалните заедници и индустријата сè почесто се соочуваат со преоптоварени електрични мрежи, енормно зголемена потрошувачка на вода за ладење на серверите и зафаќање на огромни површини обработливо и градежно земјиште.