Поранешниот вицепремиер за евроинтеграции, Никола Диммитров во Фејсбук статус ја критикува македонската Влада по посетата на бугарскиот премиер Кирил Петков во Скопје. Тој го спинува решавањето на спорот со „добрата волја Бугарија да го прифати краткото име“. За Димитров ова е „салама тактика“.
„Вчера сами јавно признаа дека го смениле пристапот и стратегијата кон Бугарија, што прво ги урива хистеричните напади за мене и тврдењата дека сме немале внатре разлики, а второ го разобличува и обидот за евтин спин дека нешто Софија отстапила (спин што добро го препознаа и некои наши медиуми).
Додека бев внатре го држев другиот пристап – ништо не е договорено додека не се договорат сите прашања – како што јавно кажа мојот наследник вчера.
Вториот ден без мене пристапот и суштината се смени во „салама тактика“ – пишува Димитров.
Владата, според него, го претставува како успех прифаќањето на „краткото име“ од страна на Бугарија во преговорите за деблокадата, ама за Димитров – реално тоа не е така.
„Велат дека сега со новиот пристап сме имале резултати веднаш – Софија „прифатила“ да го користи краткото име, нешто што само по себе не е наш проблем, туку нивен и нивно барање. За ова неосновано барање да биде прифатено ние пративме нота до ОН што Софија ја бараше две години и не ја добиваше, без притоа да направи било каква отстапка.
Сега ова биле резултатите со новиот пристап…Да се разбереме, никој никогаш не спорел дека ваков пристап би дал резултати – АМА во корист на другата страна.
Ако овој нов пристап се развива и кулминира, никој не спори и дека решение е можно, претпоставувате какво. Повеќе за суштинската штета со нотата до ОН, каде атрибутите на државата се затворени, во следниот јавен настап“ пишува Димитров на ФБ.