Поранешниот претседател на Србија и носител на листата „Обединета Србија“ Александар Вучиќ уверува дека ќе го заштити секој кого политички ќе го прогонуваат по поразот на неговата Српска Напредна Странка (СНС) на парламентарните избори.
„Јас сум виновен, нека ме гонат мене“, порача Вучиќ.
На седницата на партиското раководство, поранешниот претседател на Србија рече дека нема намера да штити поединци кои украле пари, но најави отпор кон сите истраги што ги смета за политички мотивирани. Тој директно го посочи проектот за комплексот на Генералштабот во центарот на Белград како пример за кој е подготвен да одговара.
„Како што е овој случај околу Генералштабот, како што се многу други случаи. Јас ќе кажам дека јас сум виновен, нека ме гонат мене, и јас немам никаков проблем со тоа“, порача Вучиќ.
Рече и дека напредњаците за време на своето владеење „сакале најдобро за својата земја, и дека никој не украл ниту еден динар од таквите проекти“.
„И никој не се збогати, за разлика од нив кои не знаат колку куќи и станови имаат во странство и во земјата. И ќе ги штитиме и ќе ги чуваме нашите луѓе, и ќе им се спротивставуваме, ќе им се спротивставуваме на секој чекор“, кажа Вучиќ.
Прашањето за личната одговорност на лидерите по губењето на власта отвора позната дилема за функционирањето на институциите во пост-авторитарни транзиции. Моќниците често знаат да се претстават како единствени мети на истрагите како дел од кампања за хомогенизација на партиското членство и одложување на правните процеси.
Претседателот на СНС, Милош Вучевиќ, на седницата на Главниот одбор на оваа партија претходно закажа вонредно заседание на партиското собрание за 13 декември и го предложи Александар Вучиќ за нов претседател.