Деновиве социјалните мрежи во Србија се преплавени со видеа, фотографии и тврдења дека документите се уништуваат во голем обем во државните институции, компаниите и министерствата.
Може да се видат тврдења дека вреќи со исечкани документи се изнесуваат од Министерството за финансии, МГСИ, Фондот за пензиско и други институции.
На оваа тема се осврна и Студентската листа, која денес ги повика вработените во државните институции, судовите, банките, медиумите и компаниите да пријават какво било уништување на документација, сомнителни плаќања, договори и налози.
Недолго потоа, Врховното јавно обвинителство издаде и задолжителна инструкција до обвинителите. Врховната јавна обвинителка на Србија, Загорка Доловац, им наложи на сите јавни обвинители итно да испратат барање до полицијата во врска со информациите за уништување на документи од страна на министерствата и другите институции.
„Имајќи ги предвид сознанијата и информациите презентирани на јавноста дека се уништуваат службени и други досиеја во државните институции, банките, Безбедносно-информативната агенција, Воено-разузнавачката агенција и други институции од значење за економската, финансиската и правната безбедност на Република Србија, на сите главни јавни обвинители, вршители на должноста главни јавни обвинители, им се наложува итно да испратат барање до полицијата со кое ќе им се наложи да преземат потребни дејствија за да се спречи уништувањето на досиејата, како и без одлагање да го известат надлежното јавно обвинителство за постоењето на елементите на кривичното дело Одземање или уништување на службениот печат и службената евиденција од член 328 од Кривичниот законик или друго кривично дело за кое гонењето се презема по службена должност“, изјави Доловац.
Таа потсети дека неизвршувањето на општата задолжителна инструкција на Врховниот јавен обвинител претставува дисциплинско кршење на Законот за јавно обвинителство.
Првото основно јавно обвинителство во Белград веќе оформи предмет и го испрати до Министерството за внатрешни работи, Управата за полиција, Полициската управа за градот Белград и Управата за криминалистичка полиција, на кои им е наредено веднаш да спроведат истрага.
Според нив, предметот е формиран поради текстови објавени на портали, како и снимки од социјалните мрежи, кои укажуваат на уништување на службени документи и евиденции во просториите на државните органи и јавните претпријатија.
Драган Домазет, од пензискиот фонд на Србија, истакнува дека успеале да дојдат до неколку ќеси со искинати хартии и дека успеале да реконструираат некои од нив.
„Успеавме да спасиме неколку ќеси. Буквално ги најдовме во контејнер. Колегите се обидуваат да реконструираат некои“, изјави тој за „Данас“.
Тој истакнува дека не знаат што се случувало ноќе, но дека се посомневале преку ден кога виделе дека канцелариите на директорите на секторите се заклучени.
„Вратата на генералниот директор е нормално заклучена, но канцелариите на директорите на секторите се отворени, поради разни оперативни задачи. Кога секретарките почнаа да ги заклучуваат, кога почнаа да се бараат огромни количини ќеси, видовме дека нешто се случува“, изјави Домазет.
Според неговите зборови, она што досега го утврдиле е дека главно станува збор за документи поврзани со политички активности од Фондот за ПИО, а не за документација поврзана со работењето на самиот Фонд.
„Станува збор за докази за политичка активност како што се листи. За претходните избори, во седиштето на Фондот имаше кол-центар. Тука имаше силна ќелија на СНС“, забележува Домазет, додавајќи дека сè уште не може да тврди дека меѓу уништените документи немало други документи.