Волстрит Џурнал: Владата на САД се прогласила инвеститор во Венецуела

Претседателот на САД Доналд Трамп помина месеци изјавувајќи дека со соборувањето на лидерот на Венецуела е обезбедена нафтата на земјата за Америка. Кога американските енергетски компании се спротивставија на инвестирањето со брзина и обем што тој го сакаше, неговата администрација смисли извонредно решение за да ја претвори неговата визија во реалност: да ја направи самата влада на САД инвеститор“, објавува „Волстрит џурнал“.

„Договорот објавен во петокот вечерта ќе ја трансформира американската влада од брокер на американски нафтени инвестиции во Венецуела во самиот инвеститор.“

„Тоа ќе му даде на Вашингтон директен финансиски удел во приватна компанија на која ќе ѝ бидат доделени вековни права на некои од најголемите докажани резерви на нафта во светот – и ќе ги поврзе САД поблиску со неизбраната влада што ги доделува тие права“, пишува весникот.

Претходно Соединетите Американски Држави објавија дека обезбедиле контрола врз значителен дел од огромните нафтени резерви на Венецуела, откако претседателот Доналд Трамп вети дека ќе ги „поврати“ енергетските ресурси на јужноамериканската земја.

Во петокот, Трамп објави дека неговата влада и владата на привремената претседателка на Венецуела, Делси Родригез, постигнале договор за давање на мнозинска контрола на САД врз повеќе од 65 милијарди барели докажани нафтени резерви.

Демократите го критикуваа договорот на Трамп за стекнување мнозинска контрола на САД врз 65 милиони барели венецуелска нафта.

„Да бидеме јасни: ова не е победа“, напиша сенаторот од Мериленд, Крис Ван Холен (демократ), во објава на социјалните мрежи.

„Ова е доказ дека Трамп ги стави на ризик нашите војници за да добие венецуелска нафта за своите пријатели милијардери“, продолжи тој. „Ставањето на животите на нашите војници на коцка за приватен профит е грубо занемарување на неговата уставна должност“.

Трамп го објави договорот во објава на Truth Social, нарекувајќи го „НАЈГОЛЕМИОТ НАФТЕН ДОГОВОР ВО СВЕТСКАТА ИСТОРИЈА“.

„Оваа историска трансакција ПОВЕЌЕ ОД ДВОЈНО ги зголемува американските резерви на нафта, значително го зголемува нашето снабдување со нафта и значително ќе ги намали цените на бензинот за сите Американци, долго во иднина, а воедно ќе помогне Венецуела да продолжи да се движи кон огромен успех и голем просперитет“, продолжи претседателот.

Овој договор се однесува на околу 21 процент од вкупните докажани резерви на нафта на јужноамериканската земја, кои изнесуваат околу 303 милијарди барели.

Трансакцијата следи по апсењето на венецуелскиот претседател Николас Мадуро од страна на американската војска претходно оваа година и доаѓа во услови на зголемување на трошоците за енергија за време на војната со Иран. Трамп постојано го изразува својот интерес за проширување на американските инвестиции во нафтената индустрија на Венецуела.

Сенатор Тим Кејн (демократ од Вирџинија), кој е член на Комитетот за надворешни односи на Сенатот, го обвини претседателот дека го искористил соборувањето на Мадуро за „контрола на венецуелската нафта“.

„Дали цените ќе се намалат за Американците? Кој знае, но веројатно не толку колку што Трамп ги принуди да ги зголемат преку неговата идиотска војна со Иран“, напиша Кејн на социјалната платформа X.

„Но, еве гаранција – ова ќе ги наполни џебовите на семејството Трамп и големите нафтени компании и ќе го одложи преминот кон почиста енергија“, продолжи демократот од Вирџинија. „Заклучок – користењето на нашите трупи за приватно зграпчување на нафта е корупција од епски размери!“

Републиканскиот сенатор Берни Морено (Охајо) возврати на критиките на демократите за овој договор.

„Да зависеше од демократите Мадуро сè уште ќе беше на власт, венецуелската нафта ќе одеше во Кина по половина цена, а народот на Венецуела ќе беше ограбен од корумпиран режим“, напиша пратеникот на социјалните медиуми. „Наместо тоа, овој историски договор им користи на двете земји со генерации!“