(Видео) Трилинг: Идентитетот, парите и власта – три лица на современата македонска криза

Во магазинот „Трилинг“ погледнете ги интервјуата со актерката Снежана Коневска Руси овогодинешната лауреатка на Македонскиот театарски фестивал „Војдан Чернодрински“, Јордан Ставров експерт за хидроенергија и Башким Бакиу од Алијанса на Албанците.

„Секој актер мора биде и режисер на својата улога. Не толку да се меша во режијата, во концептот на режијата, на режисерот, но во концептот на својата задача, на својата улога и мислам дека таа моја способност да го проширам не само врз својата улога, ама и врз улогите на другите во претставата допринесе до тоа да појдам во Софија да дипломирам и режија за кореодрама, пантомима, мјузикл. Така што веројатно следниот период и досегашниот се бавам и со режија и сега можам да си кажам ‘Снешка автор, актер, режисер’, бидејќи и со пишување се барам, правам драматизации, авторски текстови, сценарија, така што и последната награда во Битола на анонимниот конкурс ја добивам третата награда за монодрамски текст. Така што сега си пишувам три улоги. Тоа не се учи. Тоа веројатно го имаш и треба само да го развиваш. Книгите се моето главно мото коешто го пренесувам на моите и соработници и нови ученици и моите внуци. Без книгата нема ништо, бидејќи енергијата на умот ја создава суштината на животот, а животот е целата уметност. Да се живее значи од себе да направиш уметничко дело. Јас сега можам да бидам радосна дека сум направила на три дела од мојата уметност уметнички дела. Јас така си ги крстив“, вели Руси.

На констатацијата дека во театарот постојат кланови и дали и во оваа професија има суети, самобендисаност, ароганција, Руси вели дека сите овие епитети важат за сите луѓе, не само за уметниците.

„Едноставно човек без суета и без другите два епитета што ги спомнавте едноставно не постои. Тоа не е главното. Клановите не постојат само во театарот. На секое место околу нас без клан нема шанса. Секој ги дава своите, претпочита неговите да се околу него, а ја тоа го повторувам којзнае од колку одамна дека директорот бира дали заменик или драматург, некој што е подолу од него за да може да биде подобар. Височината на една кула се мери според сенката, а големината на еден човек според бројот на завидливците.

-Веќе сум песимист и во однос на целото општество каде што живеам, бидејќи има толку непознавања во однос на историјата, на јазикот“, додава Снежана Коневска Руси.
смета Снежана Коневска Руси.

„Јас сум пензиониран хидроинженер и повеќе од 15 години поминав во секторот за развој и инвестиции во електростопанство и во тој период можеше да се почувствува и се знаеше многу добро дека ние во електростопанство сме попречени да градиме хидротехнички објекти во клисурата на река Вардар, посебно Велес кој е еден капитален објект и Градец кој исто така е капитален објект, а покасно се направи и проектот Вардарска долина со каскадни хидроелектрани. Тоа е се еколошко мали хидроелектрани со мали висини, меѓутоа и нивните нивоа на некој начин ја потопуваа постоечката пруга. Така што за мене веста дека ќе се гради пруга беше пријатно да се слушне, затоа што знаев дека еднаш дефинитивно, после 80 години тивка војна помеѓу електростопанство и железници ќе се измести пругата и ќе може да се почне со реализација на хидротехничките објекти по долината на река Вардар.

Што се однесува за долината на реката Вардар – работена е физибилити студија за истиот проект и тој проект го работеа Французите со 80% нивно финансирање и 20% македонска инвестиција. И уште тогаш во проектната задача меѓу другото ние имавме во проектната задача јасно нагласено дека освен за енергетските објекти третирана беше и пругата. Имаше дилема дали да биде во истиот коридор или да се измести на исток. По истражување на Французите, бидејќи цената е иста, градежните работи е далеку поедноставно да се отиде на север односно, да се отиде Гевгелија – Валандово – Штип – Свети Николе – Куманово до Табановце отколку да остане во самиот коридор на река Вардар, изјави во магазинот „Трилинг“ хидроинженерот Јордан Ставров говорејќи за проектот за нова пруга кон Солун за патнички и товарен сообраќај кој е проследен со многу недоумици, неизвесности и контроверзии како и предупредувања на дел од експертите дека за ваква инфраструктура нема проектен план, нема анализа на потребите, документација за трасата.

За тоа зошто токму Гевгелија – Валандово – Штип – Свети Николе – Куманово, Ставров вели дека тоа била замислена траса уште во времето на Југославија, а овој проект бил наречен Балкан Акса.

За тоа дали има логика од Грчка страна да се има една пруга, а од наша страна две пруги, Ставров вели дека во овој момент нема логика да се прават две траси.

„Да бидеме искрени, Грците нема да не чекаат и не не чекаат. Тие си имаат најдено нови патишта и на некој начин не заобиколија и веќе имаат три влеза со Бугарија со своите возови и транспорт. Така што нив баш ништо не им значи што оваа пруга толку долг период не функционира“, додава Ставров.

Околу реакциите за финансирањето на целиот проект околу пругата и предупредувањето на проф. Дејан Трајковски дека се истрчуваме на финансискиот пазар без инвестициски проект, анализа на потребите, прометот, потребите, заштитата на човековата околина и водите и колку време е потребно за ваков сеопфатен проект за една пруга, Ставров вели дека го подржува проф. Трајковски.

„Не може пред два месеца ние да добиеме информација дека е земен кредит, склучен Договор со Велика Британија и веднаш да се ориентираме на главната инвестиција две пруги итн.. Колку јас што ги познавам работите во Македонски железници, таму по мое мислење нема ниту физибилити студија, уште помалку идеен проект, а да не зборувам за главен проект. Тоа пред некој ден го слушнав и од министерката за финансии која испрати некое писмо до 21 банка во Европа и низ светот преку кои ние ќе добиеме пари, а главен гарант за повраток на кредитот ќе биде британската страна. И таа во својата изјава, на прашање на новинарот, рече дека не видела ни идеен проект, ни физибилити студија, а истата госпоѓа праќа писма до банкиве низ Европа и светот. Тоа ми е толку контрадикторно да не знам што да кажам“, додава Ставров.

Тој смета дека градбата на нова пруга е многу чувствителна работа.

„Не може за така краток период без истражувачки работи да се влезе во инвестиција. Веќе сме подучени од автопатите што влегуваме така како што влегуваме – без истражни геолошки работи. Физибилити студијата за проектот Вардарска долина ние шест години сме ја работеле. Тоа е макотрпна работа кај што веќе добиваш една комплетна слика за целиот проект и не е проблем после да влезеш во идеен проект, кај што ќе ги добиеш цените на чинење итн. и во главен проект за детална друга разработка на трасата“, вели Ставров.

Околу неговите сомнежи за капацитетноста на овој проект со пругата, па и повикот да се консултира и Градежниот факултет, Министерството за енергетика и Советот за безбедност кај претседателката Сиљановска Давкова, Ставров вели дека не сакал да навлегува околу безбедноста, но вели дека има длабок сомнеж во тоа дека сите наши сувоземни врски од Солун до Скопје одат во еден коридор низ кој ако три дрона се фрлат ние како држава би биле парализирани и ќе немаме никакви сувоземни контакти.

„Многу е лошо во една уска долина (Вардар), аортата, крвотокот на Македонија да се најдат три вакви важни работи, хидротехнички проект, пруга и автопат, а притоа имаме можност да се поместиме на источната страна на Македонија.

„За жал функционирањето на ВЛЕН од Таравари се закочуваше. Не сум бил од почетокот во тие договори и разговори кои лидерите на ВЛЕН ги спроведувале, но бев запознаен и сега сум запознаен со информации дека и покрај тоа што функционирањето начелно како коалиција односно како тело „ВЛЕН“ било договорено да продолжи како едно тело, барањата биле нелогични од страна на Таравари и така почнало препукувањето кое за жал на крајот се донесе одлука еден дел од владата да замине во опозиција, која по нашите прогнози ќе се приближи до ДУИ а тоа не кореспондира со идејата на поддржувачите на Алијанса на Албанците кои се најцврстото тело дури и во рамките на ВЛЕН и постојано во последните 20 години се против ДУИ и власта“, изјави за магазинот „Трилинг“, Башким Бакиу од делот на АА кој остана во владата на Мицкоски за тоа каде се скрши костенот помеѓу Алијанса на Албанците кое остана во Илинденска бр. 2 и крилото кое си замина со Таравари.

Бакиу вели дека никој не може да каже дека се најдобри, но ситуацијата која е затекната бара голем напор, вложување, капацитет за нешто да се промени и тоа да се осеќа кај граѓаните без разлика на етникумот.

Околу за тоа со што може да се пофалат како дел од владината коалиција во изминативе скоро една година, притоа да се земе предвид дека се ветуваа изгласување на уставните промени во првите шест месеци и внесување на Бугарите во уставот, битка со корупцијата и расчистување со ДУИ-зација на институциите, Бакиу вели дека многу се работите со кои тие како дел од владината коалиција можат да се гордеат.

За изјавата на вицепремиерот за добро владеење Арбен Фетаи дека за само неколку месеци вработени се 2500 Албанци, а околу 800 се унапредени, Бакиу вели дека тоа не е така односно дека се работи за план преку кој во одреден период кога одреден број на вработени ќе одат во пензија на нивно место се отвора простор со цел да се надокнади и да се функционираа. Тоа е процес. Тоа не е дека ги земаме 2500 и ги ставаме на работа.

Говорејќи за фактот дека Али Ахмети и Изет Меџити од најблиски соработници станаа главни политички ривали и дали Арбен Таравари може да биде новиот лидер меѓу албанскиот блок, Бакиу вели дека аргументите и постапките кои ги гледа на самиот Меџити во моментов се многу рационални, а за останатото треба да се прашаат и едните и другите.

„Во однос на враќањето на ДУИ преку Таравари мислам дека тоа е интерпретација која ја прават тие кои не се во власта но во иднина сакаат да се вратат. Мислам дека потегот кој го направи Таравари му оневозможува во иднина да биде дел од владината коалиција. Секој прогноза е дека нема да се има промени во рамките на „македонскиот блок“. Одлуката да замине од владата во момент кога треба поголемо вложување, напор, енергија мислам дека не му остава простор во иднина он да се врати. А ако мислите дека он би можел да биде во некое раководство или пак менаџирање на ДУИ е невозможна мисија“, вели Бакиу.

Целото издание на магазинот „Трилинг’ погледнете го во видеото