Бугарскиот европратеник Ковачев бара партијата на Вучиќ да биде исклучена од ЕПП

Притисокот врз Европската народна партија (ЕПП) појасно да се одвои од Српската напредна партија (СНС) е зголемен и во рамките на таа групација и однадвор, пишува белградскиот весник „Данас“. Но соговорниците на „Данас“ тие не очекуваат дека во периодот пред изборите во Србија ќе се донесе појасна одлука, без оглед на фактот дека ЕПП покрена постапка против својот придружен член – Српската прогресивна партија.

СНС сè уште ужива заштита на дел од членовите на германската ЦДУ, без оглед на отстапувањето на партијата на Вучиќ од европските вредности.

Сепак, во последните месеци, ЕПП е сè покритична кон режимот во Белград. Неодамна, претседателот на Европската народна партија, Манфред Вебер, член на Германската христијанско-социјална унија (ЦСУ), беше скандализиран од глорификацијата на Ратко Младиќ, осуден за геноцид и други воени злосторства, оценувајќи дека тоа е спротивно на европските вредности.

Андреј Ковачев, член на Европскиот парламент и шеф на бугарската делегација во Европската народна партија, смета дека Александар Вучиќ и СНС биле толерирани предолго.

Тој тврди дека неговата политичка група покренала постапка против нејзиниот придружен член – Српската напредна партија.

За време на панел-дискусијата на форумот „ЕУ се среќава со Балканот“, што се одржа во петокот, 18 септември, во Софија, Ковачев упати остри критики кон Српската напредна партија и Александар Вучиќ.

„Тие се придружен член на ЕПП, но ние покренавме постапка против нив и сега гласовите во ЕПП се многу, многу силни. Доста е доста и чекавме предолго – Александар Вучиќ играше на двете страни многу долго“, рече Ковачев.

Бугарскиот европратеник се осврна и на ставот на одредени европски лидери кон претседателот на Србија, Александар Вучиќ.

„За жал, видовте дека дури и европските лидери како Мерц и Макрон не се сосема јасни во своите пораки, бидејќи – како што веќе споменав – ни треба Србија. Србија е исклучително важна и тие секогаш се надеваат дека она што им го кажува Александар е вистина, но не е“, заклучи Ковачев.

Душко Лопандиќ, експерт за меѓународни односи и професор по европско право, вели дека ЕПП пред повеќе од една година објави дека иницира преиспитување на статусот на СНС во ЕПП, но во меѓувреме ништо не се случи.

„ЕПП продолжи да ги поканува претставниците на СНС на своите собири, иако беше забележливо дека тие не беа вклучени како говорници и дека им беше дадена второстепена позиција, во согласност со пропаднатата позиција на Србија во процесот на интеграција во ЕУ“, објасни Лорандиќ.