Белградски професори ги повикаа Македонија, БиХ и Црна Гора да ја зајакнат контролата на парите на границата со Србија поради ризик од изнесување

Професорите на Универзитетот во Белград, Владимир Обрадовиќ и Огњен Радоњиќ, побараа од надлежните институции во Босна и Херцеговина итно да го проценат ризикот од нелегално подигање пари од Србија и да разгледаат зголемени контроли на границата.

Како што објави Nova.rs, професорите испратија 13 писма до институции во Србија и во странство. Барањето го примија Европската Унија, Црна Гора, БиХ и Северна Македонија. Тие бараат итна проценка на ризикот и разгледување на зголемени контроли на граничните премини и меѓународните аеродроми.

Причината, како што наведоа, е она што се случува во финансискиот сектор на Србија, пред сè, одземањето на лиценцата за работа на Алта банка и јавно изразија сомнежи за значајни трансфери на пари од Србија во странство.

„Постојат сериозни причини да се сомневаме дека може да има забрзано повлекување на пари од Србија. Кога има предупредувања што бараат верификација, одговорните институции не смеат да чекаат парите да исчезнат за да почнат да си ја работат својата работа“, изјавија Обрадовиќ и Радоњиќ.

Писма до царината, полицијата и финансиското разузнавање

Писмата беа испратени до Генералниот директорат на Европската комисија за даноци и царинска унија (DG TAXUD), Царинската управа на Србија, Дирекцијата за спречување на перење пари, Граничната полиција на Србија и аеродромите во Белград и во Ниш. Во регионот, тие беа примени од надлежните царински, полициски и финансиско-разузнавачки институции на Црна Гора, Северна Македонија и Босна и Херцеговина.

Од нив се бара да проценат дали треба да се зајакнат контролите на трансферот на готовина, особено на аеродромите и копнените гранични премини, и да ја интензивираат меѓународната размена на информации за можни сомнителни финансиски текови.

„Србија не смее да стане земја од која пари со сомнително потекло можат непречено да се изнесуваат, а граѓаните да бидат оставени со последиците од можните злоупотреби“, рекоа професорите.

Тие исто така побараа институциите, доколку утврдат значителни неправилности или невообичаено движење на готовина преку границата, навремено да ја информираат јавноста за тоа, почитувајќи ги законските ограничувања и заштитувајќи ги евентуалните истраги.

„Сомнежите не се доказ“

Обрадовиќ и Радоњиќ нагласуваат дека јавно изнесените тврдења за меѓународни трансфери сè уште не се потврдени и дека тие сами по себе не докажуваат нелегални активности. Нивната иницијатива, велат тие, не е насочена кон ограничување на легалното движење на граѓаните и нивниот имот, туку кон превентивни контроли врз основа на објективни индикатори за ризик.

„Парите што се легално стекнати и пренесени во согласност со прописите немаат причина да бидат предмет на сомневање. Но, ако има обид за повлекување на нелегално стекнати пари, државата мора да реагира пред да биде предоцна. Заштитата на јавниот интерес не завршува на државната граница“, заклучија тие.

Сè уште не е познато дали институциите во овие земји ќе постапат по барањето на белградските професори.