Мицковски за МИА: Една од најсовремените методи за лекување големи камења во бубрегот изведена првпат во Македонија

Ендоскопска комбинирана интраренална хирургија (ECIRS), една од најсовремените и најкомплексни уролошки процедури за третман на коралиформна и мултипла бубрежна калкулоза, е изведена првпат во Македонија, но и пошироко во регионот. Интервенцијата е изведена во Клиничката болница „Аџибадем Систина“ од страна на уролозите д-р Александар Мицковски и д-р Владимир Лозановски, со поддршка од два комплетни оперативни тимови. Методата е изведена кај 58-годишна пациентка со единствен функционален бубрег и повеќебројни камења лоцирани на тешко достапни места.

Мицковски во разговор за МИА го појаснува овој метод, нагласувајќи дека станува збор за современ минимално инвазивен метод за отстранување големи, коралиформни и камења со многубројни локации во бубрег.

– Камењата во бубрег претставуваат чест здравствен проблем кој може да предизвика силни болки, инфекции, крварење и оштетување на функцијата на бубрегот. Кај некои пациенти камењата се мали и можат сами да се исфрлат, но кај други тие достигнуваат големи димензии и бараат хируршки третман. Во последните години урологијата значително напредуваше и денес постојат современи минимално инвазивни методи кои овозможуваат успешно лекување без големи хируршки резови. Една од најсовремените техники е: Endoscopic Combined Intrarenal Surgery – позната како ECIRS. Оваа процедура претставува комбинација на две ендоскопски техники за истовремено и поефикасно отстранување на камењата од бубрегот, нагласува тој.

Мицковски појаснува дека ECIRS е современа уролошка процедура при која лекарите истовремено пристапуваат до бубрегот на два начина: преку природните уринарни патишта (уретра, мочен меур и уретер) и преку мал отвор на кожата во пределот на слабината. Додава дека на овој начин хирургот има подобра прегледност и полесно може целосно да ги отстрани камењата и за разлика од класичните операции, кај овој метод нема голем хируршки рез, болката е помала, закрепнувањето е побрзо, а престојот во болница е пократок.

Овој метод најчесто се користи кај големи камења во бубрег, повеќе камења истовремено, таканаречени „корални“ или стагхорн камења, камења кои не можат успешно да се третираат со други методи, пациенти кај кои претходните процедури биле неуспешни. Методата е особено корисна кога камењата зафаќаат повеќе делови од бубрегот.

Пред интервенцијата пациентот прави лабораториски анализи, уринокултура, компјутерска томографија (CT), уролошки преглед. Овие испитувања му помагаат на урологот точно да ја одреди големината и положбата на каменот.

– Процедурата се изведува под општа анестезија, што значи дека пациентот спие и не чувствува болка. Хирургот користи тенки инструменти и камера со висока резолуција. Во првиот пристап преку уринарниот канал се воведува флексибилен инструмент до бубрегот, во вториот пристап се прави мал отвор на кожата преку кој се пристапува директно до бубрегот. Со комбинирање на двата пристапи каменот полесно се пронаоѓа, се дроби со ласер или ултразвучна енергија, а фрагментите се отстрануваат, нагласува Мицковски.

Тој појаснува дека методата има многу предности во споредба со класичната хирургија – нема голем хируршки рез, се прави само мал отвор на кожата, пациентите имаат значително помалку болка по операцијата, закрепнувањето е брзо и во повеќето случаи пациентот се враќа на секојдневните активности за неколку дена. Исто така, додава дека престојот во болница е пократок, вообичаено трае од еден до три дена, има висока успешност и во најголем број случаи камењата целосно се отстрануваат со една интервенција и има помал ризик од компликации.

– ECIRS денес се смета за безбедна и современа метода кога ја изведува искусен уролошки тим. Сепак, како и кај секоја медицинска процедура, постојат можни компликации: крварење, инфекција, температура, болка, појава на преостанати мали фрагменти. Сериозните компликации се ретки. По процедурата пациентот обично добива инфузија и терапија, пие повеќе течности, неколку дена има лесна непријатност или крв во урината. Во некои случаи се поставува: уринарен катетер или Double-J стент кој привремено помага урината нормално да се одлева. Поголемиот дел од пациентите брзо се враќаат на нормален живот, појаснува Мицковски.

По успешниот третман многу е важно да се спречи повторно создавање камења и како што појаснува Мицковски најчесто се препорачува внесување повеќе вода, намалување на солта, правилна исхрана, редовни уролошки контроли и лекување на уринарни инфекции.

– Endoscopic Combined Intrarenal Surgery претставува една од најсовремените и најефикасни методи за лекување на големи и сложени камења во бубрегот. Со помош на минимално инвазивен пристап, современа технологија и ласерска енергија, уролозите денес можат успешно да ги отстранат камењата со минимална болка и брзо закрепнување. Оваа метода значително го подобрува квалитетот на живот на пациентите и претставува голем напредок во современата урологија.

Најчеста причина за создавање бубрежни камења е недоволното внесување течности

Бубрежните камења претставуваат чест здравствен проблем кој може да предизвика силни болки и сериозни уринарни компликации. Тие се создаваат кога во урината се наталожуваат минерали и соли кои постепено формираат цврсти кристали, односно камења. Камењата можат да бидат многу мали, како зрно песок, но понекогаш достигнуваат и големи димензии.

Мицковски појаснува дека најчеста причина за создавање бубрежни камења е недоволното внесување течности. Кога организмот не добива доволно вода, вели тој, урината станува поконцентрирана, што овозможува полесно таложење на минералите.

– Освен тоа, важна улога има и неправилната исхрана, особено прекумерното внесување сол, газирани пијалоци, брза храна и големи количини животински протеини. Кај некои луѓе постои и наследна предиспозиција, што значи дека ако некој член од семејството имал бубрежни камења, ризикот е поголем. Уринарните инфекции, одредени метаболни заболувања и недоволната физичка активност исто така можат да придонесат за појава на камења, нагласува докторот.

Симптомите, кои укажуваат на постоење камења во бубрезите, најчесто вклучуваат силна болка во слабината, болка која се шири кон препоните, крв во урината, печење при мокрење, мачнина и повраќање.

– Превенцијата е многу важна и во најголем дел зависи од животните навики. Најважна мерка е внесување доволно течности, особено вода. Повеќето луѓе треба да пијат најмалку два до три литри вода дневно, особено во летниот период. Се препорачува: намалување на солта во исхраната, умерено внесување месо, избегнување прекумерни газирани пијалоци, одржување нормална телесна тежина, редовна физичка активност. Редовните уролошки контроли се особено важни кај лица кои веќе имале камења, бидејќи кај нив постои поголем ризик за повторна појава. Денес, благодарение на современата медицина и минимално инвазивните уролошки процедури, бубрежните камења успешно се лекуваат. Сепак, правилната превенција останува најдобриот начин за зачувување на здравјето на бубрезите, порачува доктор Мицковски во разговор за МИА.