ССМ им даде жолт картон на врховните судии

Дојдовме пред Врховниот суд за да им завртиме грбот и да им покажеме на оние судии кои ја донесоа срамната пресуда за конфискација на Работничкиот дом. Тројца судии сакаат да направат штета на целокупното работничко движење на Македонија, да го направат да молчи и да биде понизен. Денеска дојдовме само раководствата на синдикатите за да им кажеме на судиите дека време е правото и правдата да победи.

Ова денеска го изјави претседателот на ССМ, Слободан Трендафилов на протестот на синдикалните здруженија пред Врховниот суд.

Најави дека ќе излезат во што поголем број доколку одлуката не се поништи до 1-ви мај.

– Денеска им даваме жолт картон, а доколку е потребно можеме да бидеме и 7.000 и 70.000 членови и ќе застанеме овде. Ќе почнеме од Врховниот суд – рече Трендафилов и посочи дека ќе ги искористат сите правни механизми и пред Меѓународниот суд во Стразбур.

До 15-ти мај истекува рокот за тужба против државата.

– Не сакаме да ја напаѓаме и тужиме државата и да ги срамиме политичарите, судиите и функционерите. Доколку ова не заврши до 1-ми мај, ќе тужиме во Стразбур. Доколку влезат во нашиот дом, ќе влеземе во нивните домови – доколку го земат нашиот дом, ќе ги земеме нивните домови. Отстапка назад нема, доведени сме до ѕидот – потенцираше Трендафилов.