Македонската ракометна репрезентација го запиша и вториот убедлив пораз на Европското првенство, вечерва од домаќинот Германија со 25-34 во рамки на групата А.
За разлика од првата средба со Франција, кога игравме егал во почетните 15 минути и солидно прво полувреме, денеска избраниците на селекторот Кирил Лазаров беа надиграни уште од првата минута.
Германија го презема водството на стартот и само го надоградуваше од минута во минута. Секоја грешка на Македонија во нападот, беше безмилосно казнета на спротивната страна со топката во нашата мрежа. На полувремето имавме негатива од 13-18, а во вториот дел таа отиде и на +10. Немавме никакви шанси посериозно да им се доближиме на Германците, кои не дозволија опуштање во ниту еден момент.
Имавме неверојатни 25 загубени топки и четири технички грешки, па конечниот резултат 25-34 точно ги отсликува сите случувања на теренот.
Ненад Костески со шест голови беше најефикаен во нашиот табор, Жарко Пешевски и Томислав Јагуриновски имаа по четири постигнати голови.
Германија со денешната победа веќе се квалификуваше за главната фаза на турнирот, а Македонија оечкувано ги загуби сите шанси за прогрес. Во последното коло од групната фаза во вторник ќе ги одмериме силите со Швајцарија, која денеска сензационално извлече реми 26-26 против Франција.