Турскиот претседател Реџеп Таип Ердоган рече дека врши притисок врз Русија да го продолжи Договорот за извоз на жито од украинските пристаништа во Црното Море за најмалку три месеци и најави посета на рускиот претседател Владимир Путин во август.
На заедничката прес-конференција со украинскиот претседател Володимир Зеленски, Ердоган истакна дека се работи на продолжување на Договорот и по истекот на 17 јули.
Турскиот претседател рече дека тоа ќе биде најважната тема со Путин на нивната средба следниот месец во Турција.
„Се надеваме дека договорот ќе се продолжува барем еднаш на секои три месеци, а не два. Ќе вложиме напори и ќе се обидеме тој период да го продолжиме на две години“, рече Ердоган.
Зеленски пристигна во Турција по посетата на Бугарија и Чешката Република, што е дел од неговата турнеја низ главните градови на земјите-членки на НАТО за да ги охрабри да преземат конкретни чекори кон можното членство на Киев во Алијансата на самитот следната недела.
Освен за продолжување на договорот за извоз на жито, Ердоган и Зеленски разговарале и за размена на затвореници.
Минатата година, со посредство на Турција и ОН, Русија и Украина постигнаа договор со кој се овозможи безбеден извоз на жито од украинските пристаништа во Црното Море.