Mилан и Интер вечерва од 21:00 часот го играат првиот натпревар од полуфиналето во Лигата на шампионите, а натпреварот со изјава за српски „Информер“ го најави и македонската фудбалска легенда Дарко Панчев.
Според изјавата на Панчев, Интер е во подобра форма, а освен тоа за настап кај Милан неизвесен е и Леао кој многу значи во составот на Пиоли.
„Милан е домаќин, но бидејќи играат на ист стадион кој двете екипи одлично го познаваат, домашниот терен сега и не е некоја предност. Голема работа е што два италијански клуба стигнаа до полуфиналето. На такво нешто не се надеваше веројатно никој. Интер е во дбра форма, има одлични поединци, додека Милан во овој момент е во мал пад, на сето тоа се повреди и Леао. Ако не игра Леао, блага предност му давам на Интер“, изјави Панчев.
Сепак, Панчев смета дека патникот во финалето нема да биде решен вечерва, а негов фаворит за освојување на европскиот трон е Манчестер Сити.
„Очекувам Милан и Интер да водат изедначена битка до крајот на вториот натпревар. Како што кажав, предност му давам на Интер, но и да победи, тоа нема да биде убедливо. Пред два месеци кажав дека Манчестер Сити ќе ја освои Лигата на шампионите и се уште стојам на тој став, парите играат важна улога во фудбалот“, изјави Панчев.