Политичките претставници од Прешево, Медвеѓа и Бујановац продолжуваат да бараат правата што Белград ги бара за Србите на Косово да им бидат обезбедени на Албанците во овие општини. Во пресрет на средбата меѓу српскиот претседател и косовскиот премиер на која треба да биде претставен статутот на ЈСО, албанскиот пратеник во српското Собрание Шаип Камбери нагласува дека реципроцитетот е политичка и стратешка цел на Албанците.
Камбери во интервју за Радио Косово се пожали на, како што наведува, „жестока дискриминација“ од српскиот државен врв, со која, додава, се соочила речиси секоја генерација Албанци.
„Тоа се одрази на Косово, особено преку варварските злосторства што се случија во последната војна. Затоа, целата таа политичка и воена машинерија, која го угнетуваше Косово една деценија, по завршувањето на војната, најмногу беше концентрирана во Долината“, рече Камбери, пренесува порталот КоСсев.
Тој вели дека Албанците сè уште се соочуваат со „истата практика на дискриминација, империјалистичка и хегемонистичка политика, која Србија сè уште мисли и се надева дека ќе ја применува на Албанците, особено на Косово“.
„За жал, и покрај тоа што влеговме во третата деценија на 21 век, политичката елита во Србија сè уште не сфати дека времето на колониите помина… Србија, надевајќи се дека сепак ќе го има Косово како колонија, продолжува со својата апсурдна политика, анахрона, тоа е политика заснована на митовите и митологијата од минатото“, смета Камбери.
Тој тврди дека „демократизацијата на Србија“ е неопходна за остварување на правата на Албанците.
Камбери рече дека има редовни контакти со американскиот амбасадор во Белград, Кристофер Хил, со шефот на мисијата на ОБСЕ во Србија, амбасадорот Јан Брату, кој служел и во Косово, додавајќи дека сите се детално информирани за ситуацијата.
Тој потсети и дека неодамна делегација на Албанци од Прешево, Медвеѓа и Бујановац го посети Вашингтон, каде што се сретна со американскиот претставник за Западен Балкан, Габриел Ескобар.
„Го информиравме за подигање на свеста за проблемот со Албанците во долината, барајќи од него да се вклучи повеќе за да правата на Албанците од Прешево да бидат дел од договорот“, посочи тој.
Камбери тврди и дека испратиле писмено барање до претставниците на Европската унија, односно до пратеникот за дијалог меѓу Белград и Приштина, Мирослав Лајчак, и до високиот претставник на ЕУ, Жозеп Борел.
„Барајќи од нив максимална посветеност да не го остават настрана прашањето за Албанците и да не дозволат изградба на двојни стандарди во третманот на малцинствата. Барајќи, значи, изградба на униформност во правата, што би било предуслов за стабилност меѓу земјите на Балканот“, смета Камбери.
Но, тој наведува дека се уште не добиле одговор.
„Ние ќе продолжиме да лобираме во Вашингтон, особено со американските законодавци за да се поттикне прашањето за Албанците напред“, рече тој.
На прашањето „дали мисли дека овој проект може да се турка понатаму“, Камбери тврди дека не се надева оти Србија „доброволно ќе го прифати“.
„Таа ќе ги прифати овие прашања само под еден услов, кога меѓународната заедница е будна, дури и на заканувачки начин кон неа, дека мора да се почитуваат стандардите на ЕУ, каде што Србија барем има намера да се приклучи. Неговата демократизација најмногу ќе се види во тоа како ги почитува правата на малцинствата“, смета Камбери.
Овој пратеник е сигурен дека Белград ќе биде „принуден“ да склучи конечен договор со Приштина.
Тој рече дека се прави напредок во вистинската насока кога е во прашање дијалогот, „и покрај тоа што Вучиќ изгледа како да е непобедлив“.
„Дали ќе има потпис или не, не знам толку детално, но убеден сум дека ситуацијата околу Украина, таква хомогенизација нема во ЕУ со години, таква трансатлантска координација ЕУ-САД, за сите претходните години тоа не се случуваше и ќе ја принуди Србија да ги почитува условите и договорот со Албанците“, смета Камбери.