Денеска се очекува корекција на замрзнатите цени кај зеленчукот и овошјето

Владата треба денеска да донесе одлука со која ќе се ревидираат дел од замрзнатите цени на овошјето и зелечнукот во земјава.

Министерот за економија Крешник Бектеши најав дека ниту еден од производите опфатени со одлуката нема да биде поскап од 100 денари за килограм.

-Договорено е да се направи мала корекција на цените, имајќи предвид дека трговците веќе почнале да пријавуваат увозни цени кои кореспондираат со тоа што се дава како фактури во другите држави. Генерално, увезуваме од Турција, Грција, Албанија и Србија и повикувајќи се на новите цени кои се пријавуваат во Царинската управа, во вторник Владата ќе ги коригира замрзнатите цени и ќе има кај одредени производи многу мало намалување како највисока цена на овие производи, но, никако нема да има цени како сега или пред 10 дена, од 130 до 150 денари. Ниту еден од производите кои беа наведени во одлуката за замрзнување на цените нема да има повисока цена од 100 денари за килограм. Ќе има мала корекција само во делот на доматите и краставиците зашто нема веќе увоз од Турција и од Грција каде што има поголемо производство на овие производи. Генерално, до крајот на месецов увоз се врши од Албанија и еден мал дел од Србија, заради тоа што во Албанија еден месец однапред излегуваат овие производи, рече Бектеши.

Повтори дека нема да се толерираат маржи од 100 или 200 отсто. Ќе продолжат и контролите за тоа како е реализиран увозот на овошје и зеленчук последните месеци.

Последните податоци покажале мало зголемување на увозните декларации на некои производи, па Бектеши рече дека би требало да се коригираат и замрзнатите цени.

„Корекцијата ќе биде процентуална во зависност од зголемените трошоци за увоз прикажани во Царината од 28 март до денеска. Колку се зголемени цените на увозот на одредени производи, толку процентуално ќе се зголеми и цената која е замрзната. Ако има намалување на цените кои се прикажани во Царинската управа, процентуално ќе се намали цената на тој производ, а ако е истата, ќе остане иста цената“ објасни министерот во петокот.

Од 5 април се замрзнаа цените на 11 видови овошје и зеленчук.

Килограм свежи домати може да чини максимум 70 денари, килограм краставици 75 денари, килограм кромид 60 денари, килограм карфиол 70 денари, килограм свежи зелени пиперки 90 денари, килограм грав 75 денари, килограм леќа 110 денари, килограм банани 70 денари, килограм портокали 55 денари, килограм мандарини 60 денари и килограм лимони 55 денари.