Професори од универзитетот во Њујорк, Универзитетот Принстон и Универзитетот во Пенсилванија во својот нов труд насловен „Како четботовите како ChatGPT ќе влијаат на професиите и различните индустрии?“ се обиделе да расветлат кои професии ќе бидат први на удар од најбрзо растечката технологија во светот.
„Веруваме дека новите откритија во вештачката интелигенција најмногу ќе ги погодат работниците во телемаркетингот, а потоа професорите кои предаваат јазици, литература и историја во средните училишта“, наведуваат научниците.
„Клучно беше да се препознаат десетте области во кои вештачката интелигенција постигнала најголем напредок (препознавање слики, препознавање говор, моделирање јазик, апстрактни стратешки игри…) и да се поврзат со 52 вештини кои луѓето ги користат во својата професија“, објави еден од истражувачите на Твитер, реферирајќи се на споменатиот труд.
Учителите и вработените во финансиските служби, според овие истражувања, би можеле да бидат првите жртви на ChatGPT.
Сепак, треба да се нагласи дека ChatGPT сè уште не е најпрецизен во обезбедувањето на вистинските информации, што доведува во прашање како ќе ги подучува другите за историјата. Исто така, ChatGPT не е најдобар во математика, што е есенцијално за финансискиот сектор.