Ѓоковиќ: И покрај сè, сакам да играм на Австралија опен

Првиот светски тениски рекет во моментов – Новак Ѓоковиќ (34) попладнево даде изјави по одлуката на австралискиот суд со која беше поништена неговата депортација.

„Задоволен сум и благодарен што судијата ја спречи депортацијата. И покрај сè што се случи изминатава недела, сакам да останам и да учествувам на Австралија опен. Останувам фокусиран на ова, летав овде за да играм на еден од најважните турнири пред големи навивачи. Засега не можам да кажам повеќе, но ви благодарам што ме поддржувате во сето ова и ме охрабривте да останам силен“ – изјави Ѓоковиќ.

Денеска судијата на Федералниот суд во Мелбурн, Ентони Кели, ја усвои жалбата на Ѓоковиќ поради укинувањето на визата од страна на австралиската гранична служба и нареди негово ослободување од имиграцискиот притвор во рок од 30 минути по завршувањето на сослушувањето.

Претходно, ноќта на 6 јануари, на Србинот не му беше дозволен влез во Австралија поради недоволни податоци за медицинско ослободување од вакцинација против коронавирус, но спортистот ја оспори оваа одлука на суд.

Ѓоковиќ е деветкратен и актуелен шампион на Австралија опен.

Вкупно, Србинот има освоено 20 титули на грен слем турнирите, исто толку што имаат и Роџер Федерер и Рафаел Надал.