Словенците на референдумот ги поддржаа предложените закони на владата
На референдумот гласачите во Словенија поддржаа три предлог закони – за владата, измените на законот за долгорочна нега и законот за радиодифузија, чие усвојување опозициската Словенечка демократска партија сакаше да го спречи со предлагање референдум.
Според мнозинството од преброените гласови, резултатите се следни: законот за РТВ Словенија го поддржале 62,80 отсто од гласачите, а 37,20 отсто гласале против; За законот за долгорочна нега се изјасниле 62,23 отсто, а против 37,78 отсто, а за предлог-законот за Влада гласале 56,65 отсто, а против 43,34 отсто, јавува РТВ Словенија.
Премиерот на Словенија Роберт Голоб смета дека исходот од вчерашниот референдум е јасна порака дека владата не е избрана за да ја кочи работата на државата, туку да работи за доброто на граѓаните.
Тој изрази уверување дека опозицијата нема повторно да ги запре законите кои беа изгласани на референдумот и им се заблагодари на гласачите што сериозно ја сфатиле пораката за учество на референдумот.
Според него, пораката од референдумот е јасна во контекст на излезноста, поради што изразил надеж дека опозицијата „скромно ќе ја прифати волјата на народот“.
„Не очекувам никој да поднесе оставка, никој уште нема да оди во пензија, барем не утре. Очекувам, сепак, опозицијата да нема потези со цел да ја запре волјата на народот изразена денеска, туку понизно ќе ја прифати тоа. Да почнеме сите заедно да работиме за иднината. Среќно Словенија“, рече словенечкиот премиер и изрази уверување дека сите ќе покажат зрелост и дека во иднина „ќе живееме во подобра Словенија“.
Голоб најави дека следната недела ќе ги соопшти имињата на идните министри, велејќи дека тоа е „работа на коалициските партнери во владата“.
Резултатите од гласањето нема да бидат конечни пред да се дополнат со резултатите од гласањето по пошта, а на 5 декември со ливчиња од странство, па се очекува официјалните резултати од референдумот да бидат познати дури во јануари.
Иницијатор на референдумот беше опозициската СДС која сака да го спречи спроведувањето на овие три закони, објави претходно агенцијата СТА. Предлог-законот за влада го отвора патот за зголемување на бројот на министерствата, а законот за радиодифузија има за цел да го деполитизира јавниот радиодифузен сервис РТВ Словенија.