Поранешниот претседател на САД, Бил Клинтон изјави денеска дека проширувањето на НАТО кон исток не е причина за рускиот напад врз Украина.
„Мислам дека ја направивме вистинската работа во вистинско време, а да не беше, ваква криза можеше да се случи порано“ – изјави Клинтон во интервју за „Си-Ен-Ен“.
Тој ги отфрли како неосновани тврдењата на Русија дека била принудена да интервенира во Украина бидејќи НАТО се проширил до нејзините граници.
„Тоа не е точно, а претседателот на Русија, Владимир Путин, не крие дека исчезнувањето на Советскиот Сојуз го смета за голема трагедија“ – рече Клинтон.
Според него, НАТО никогаш немал намера да и се заканува на Русија, а источноевропските земји имале право да живеат безбедно по децениската руска доминација.
„Кога го направив тоа што го направив, ѝ понудив на Русија не само посебно партнерство со НАТО, туку и можност за евентуално приклучување во нашата алијанса“, рече Клинтон.
Тој додаде дека тоа го објаснува со фактот дека најголемите безбедносни проблеми во иднина ќе бидат недржавните актери или авторитарни држави кои продаваат хемиски, биолошки или нуклеарни капацитети на терористичките групи, па затоа смета дека НАТО и Русија треба да се борат против тоа. заедно.