(Видео) Осум минути молк за насилната смрт на Периш на Психијатрија – Хрватските граѓани бараат вистина и одговорност

Во Загреб, Сплит и Осиек, точно напладне, се одржаа собири под мотото „Да молчиме за Кристијан осум минути“, во спомен на 32-годишниот Кристијан Јосип Периш, кој почина по трагичниот настан во болницата во Јанкомир, Загреб.

Собраните граѓани му оддадоа почит со осум минути молчење, барајќи целосно расветлување на околностите под кои починал младиот човек и утврдување на одговорноста на сите инволвирани.

Во Загреб, граѓаните се собраа на Цветниот плоштад, каде што осумте минути молчење симболично го претставуваа времето во кое, според наводите изнесени на собирот, Кристијан бил изложен на насилство додека бил врзан за болничкиот кревет.

Присутните побараа одговори како е можно човек кој дошол во здравствена установа за да побара медицинска помош да доживее таква трагедија токму на местото каде што требало да добие нега и заштита. Порачаа дека нема да се откажат од барањето за вистината сè додека не се утврдат сите околности на случајот и одговорноста на оние кои учествувале во настанот.

Собирите се организирани на иницијатива на студенти, кои нагласија дека нивната цел не е политичко дејствување, туку изразување солидарност и барање правда за починатиот млад човек.

„Тука сме поради смртта на Кристијан Периш. Остро го осудуваме и веруваме дека вакви работи не треба да се случуваат на место каде што луѓето доаѓаат да бараат помош. Не сакаме ова да се прикажува како каков било вид политички митинг бидејќи не е. Едноставно сме тука како студенти кои веруваат дека можат да променат нешто и имаат верба во подобро утре“, изјави еден од учесниците на собирот, пренесува ХРТ.