Даниела Андоновска-Трајковска добитничка на наградата „Даница Ручигај“ на ДПМ за 2026

На Конкурсот за наградата „Даница Ручигај“ за најдобра необјавена поетска книга за 2026 година, што ја доделува Друштвото на писателите на Македонија, учествуваа 12 авторки и автори со своите поетски дела.

Жири-комисијата во состав: Ана Пејчинова (членка), Петре Димовски (претседател) и Ахмет Селмани (член), со два гласа „за“ и еден „против“, донесе одлука наградата „Даница Ручигај“ за 2026 година да ѝ биде доделена на поетската книга „Синтакса на постоењето“ од Даниела Андоновска-Трајковска.

Образложение за наградениот ракопис
„Во ракописот ‘Синтакса на постоењето’ од Даниела Андоновска-Трајковска се отвора вечната борба меѓу доброто и злото, светлината и темнината. Поетесата го следи нивното присуство и дејствување низ времето, градејќи симболички свет во кој доброто се јавува како сила што му се спротивставува на злото и настојува да го потисне. Иако злото често настапува ненадејно и прикриено, маскирано во навидум безопасни облици и проследено со измама, доброто останува непоколебливо и го потврдува човековото настојување кон морално и достоинствено постоење.

‘Синтакса на постоењето’ се издвојува со спојот на реалното и ониричното, како и со внимателно изграден поетски јазик со изразена семантичка густина. Самиот наслов на книгата е нетипичен и функционално клучен за нејзиното читање: нè воведува во онтолошкиот простор на човековото постоење и во неговите внатрешни закономерности. Поетскиот свет на книгата се гради преку контрасти и парадокси, со чие посредство авторката ги отвора прашањата за човекот, неговото постоење и потрагата по смисла. Токму во единството на тематскиот слој, поетскиот јазик и специфичната имагинативна структура, Комисијата ја препознава вредноста на ракописот и причината поради која му ја доделува наградата ‘Даница Ручигај’ за 2026 година“, стои во образложението на Комисијата за наградениот ракопис.

Добитничката на наградата ќе добие плакета (повелба), а победничката стихозбирка ќе биде објавена во едицијата „Даница Ручигај“, што ја издава Друштвото на писателите на Македонија.

Ова е второ издание на конкурсот во формат во кој се наградува необјавен поетски ракопис. Прва добитничка беше Александра Јуруковска, наградена за ракописот „Ткажалки“, стихозбирка со која започна едицијата „Даница Ручигај“.

Конкурсот се реализира со поддршка на Министерството за култура и туризам.