ЕУ и Германија бараат конкретни реформи – Сали: Проширувањето на ЕУ е безбедносно прашање
„Во време кога Европа се соочува со невидени геополитички предизвици, неизвесност и штетни надворешни влијанија, оставањето делови од нашиот континент во сива зона не е опција. Затоа, проширувањето мора да остане стратешка инвестиција за посилна, побезбедна и поодржлива Европа и ние мора да ја претвориме оваа политичка посветеност во конкретни резултати“, вели Беким Сали.
Во новите геополитички услови, проширувањето на ЕУ не треба да се гледа само како економски проект, туку и како прашање на безбедност и стабилност, изјави првиот вицепремиер и министер за европски прашања, Беким Сали.
Тој рече дека Македонија и другите земји-кандидатки за ЕУ треба да го забрзаат процесот на реформи преку координирана работа меѓу владите, парламентите и политичките актери.
„Во време кога Европа се соочува со невидени геополитички предизвици, неизвесност и штетни надворешни влијанија, оставањето делови од нашиот континент во сива зона не е опција. Затоа, проширувањето мора да остане стратешка инвестиција за посилна, побезбедна и поодржлива Европа и ние мора да ја претвориме оваа политичка посветеност во конкретни резултати“, вели Беким Сали.
Делегацијата на ЕУ во Скопје повика новиот моментум за проширување да се трансформира во конкретни реформи и веродостојни резултати. Заменик-шефот на Делегацијата на ЕУ во Скопје, Бен Нупнау, исто така, ја нагласи важноста на постепената интеграција, преку која граѓаните и бизнисите ќе можат да ги почувствуваат придобивките од ЕУ за време на самиот процес на пристапување.
„Прво, моментумот за проширување мора да се претвори во конкретни и веродостојни реформи и резултати и обратно. Второ, постепената интеграција ќе им донесе придобивки од ЕУ на граѓаните и бизнисите во текот на целиот процес и трето, сите треба да го искористиме постојното искуство и експертиза во регионот“, вели Бен Нупнау.
Германија, исто така, даде јасна поддршка за европскиот пат на Македонија. Германската амбасадорка во земјата, Петра Дрекслер, рече дека реформите и владеењето на правото остануваат основа на процесот на проширување, додека геополитичките случувања ја направија европската перспектива уште поважна за стабилноста на регионот.
„Секако, процесот на проширување мора да остане цврсто базиран на демократските вредности, владеењето на правото и ефикасното спроведување на реформите. Сепак, геополитичките предизвици фундаментално ја променија итноста на овој процес. Европската перспектива повеќе не е само долгорочна цел, туку стратешка неопходност за стабилност во вашите региони“, вели Петра Дрекслер.
Меѓурегионалниот состанок на главните преговарачи и високите претставници за европска интеграција се одржа во Скопје, со учество на претставници од Западен Балкан, Украина, Молдавија и Грузија, како и претставници на ЕУ и меѓународни партнери.