Макрон ги смирува тензиите со Иран: Не планираме да испраќаме бродови во Ормускиот теснец

Францускиот претседател Емануел Макрон изјави дека неговата земја „никогаш не размислувала за распоредување“ поморски сили во Ормускиот теснец, туку само за безбедносна мисија „во договор со Иран“.

На прес-конференцијата одржана во Најроби, францускиот претседател повтори дека се спротивставува на „секаква блокада, без оглед на нејзиниот извор“, без разлика дали е американска или иранска, и дека отфрла плаќање какви било такси „за да се овозможи слобода на пловидба“.

Оваа порака дојде како одговор на Иран, кој вчера се закани со „решителен и непосреден одговор“ во случај на распоредување на француски и британски поморски сили во Ормускиот теснец, откако Париз и Лондон објавија испраќање воени бродови во регионот.

Никогаш немало разговор за распоредување бродови, но ние сме подготвени – нагласи Макрон.

– Воспоставивме ад хок мисија, предводена од Британците, во која учествуваат 50 земји и меѓународни организации, со цел да се обезбеди продолжување на поморскиот сообраќај штом условите дозволат, во соработка со Иран и со цел намалување на тензиите со сите земји во регионот и со Соединетите Американски Држави – објасни тој, особено во однос на транспортот на ѓубрива, храна и јаглеводороди.

Франција минатата недела објави дека нејзиниот носач на авиони „Шарл де Гол“ поминал низ Суецкиот канал за да биде подготвен во случај да се изврши таква мисија во иднина.