Нови четири услуги од Фондот за здравствено осигурување се достапни на националниот портал за услуги – uslugi.gov.mk. Три од нив се наменети за физички, а една за правни лица, информираа министерот за дигитална трансформација, Стефан Андоновски, и директорот на ФЗО, Сашо Клековски, на денешната прес-конференција во Владата.
За физичките лица воведени се електронските услуги: потврда за пријави и одјави во задолжително здравствено осигурување, потврда за осигурено или неосигурено лице и платен придонес, потврда за исплатен надоместок за плата за време на привремена спреченост од работа.
Првпат за правните лица овозможена е електронската услуга за издавање потврда за платен придонес за задолжително здравствено осигурување, целосно дигитално и достапно во секое време.
Беше нагласено дека станува збор за услуги што директно го поедноставуваат пристапот до важни документи, го намалуваат административниот товар и ги елиминираат непотребното чекање и физичкото присуство на шалтерите. Дополнително, ФЗО од денеска е и технички поврзан со Централниот регистар на населението, што овозможува автоматско преземање релевантни податоци за граѓаните.
– Нашата цел е јасна и постојана – јавните услуги да бидат достапни и постојани, поврзани и ориентирани кон потребите на граѓаните и бизнисите. Денеска означуваме почеток на плодна соработка со една од клучните институции во здравствениот сектор – ФЗО, кој нуди услуги на сите сограѓани, но и на компаниите. Со Фондот денеска правиме еден значаен чекор напред во насока на дигиталната трансформација преку воведување четири нови е-услуги, кои директно го поедноставуваат пристапот до важни документи, го намалуваат административниот товар за институциите и граѓаните и ги елиминираат непотребното чекање и физичкото присуство на шалтерите – рече министерот Андоновски.
Тој вели дека за одредени услуги и документи што граѓаните ги добивале во хартиена форма тоа нема да се укине и ќе остане како опција, но оти за новите е-услуги, како студентскиот ваучер, ќе се оди на целосна дигитализација.
– Ние зазедовме стратешки пристап да не дозволиме услуги што постоеле на хартија да бидат целосно заменети со дигитални услуги доколку тоа е во корист на граѓаните. Ако некои сметаат дека сакаат да си ја завршат работата хартиено, тоа нема да им биде скратено. Што се однесува до новите услуги што ги нудиме, како е-ваучерите за студентите, намерно стратешки одлучивме да бидат преку е-порталот за да ги научиме младите дека може и треба да ги користат – рече Андоновски.
Директорот на Фондот, Клековски, вели оти е цврсто уверен оти „процесите во една мала земја како Македонија мора да бидат координирани и централизирани од едно место со цел се добие стандарден пристап за сите“. МТД, како што вели, го овозможува тој пристап и услугите што денеска беа промовирани се заслуга и на самото Министерство, а не само на ФЗО.
– Поставувањето на овие четири услуги на Е-услуги е овозможено со податочната поврзаност со Фондот и МДТ, меѓутоа ние, верувајќи дека клучот е во координацијата и во поврзувањето, исто така сме поврзани со АВРМ, со Управата за водење ан матичните книги, со Министерството за социјална политика, Централниот регистар ни е во подготовка, а имаме директно поврзување со две важни институции за нас, а тоа е „Мој термин“ и Управата за јавни приходи. Ваквото вмрежување ќе ги олеснува и нашите меѓусебни комуникации, но крајниот ефект ќе биде олеснет пристап до услуги од страна на државата кон граѓаните – истакна Клековски.
Според него, се работи на дигитализација на комуникацијата на ФЗО со сите ЈЗУ и ПЗУ, кои имаат договор со Фондот, а во најголем дел е дигитализирана и процедурата на инвитро. Најави дека многу бргу ќе биде дигитализирано и поднесувањето барање за инвитро, а оти сега ваучерите се доставуваат електронски.
Вели дека реализацијата на проектот „Е-рецепт“’ треба да биде завршена до пролетва, а се работи и на ново геомапирање на сите ЈЗУ и ПЗУ, кои работат со Фондот и приказ кој какви услуги нуди во реално време.
– Набргу ќе бидат дигитализирани нови 27 услуги, меѓу кои барањето за надомест или рефундација на средства. Граѓаните нема да мора да доаѓаат во подрачните служби на Фондот да поднесуваат барање за рефундација, дали за ортопедски помагала, дали лекови, пелени…, а ќе се дигитализираат и барањата за лекување во странство. Со тоа ќе се овозможи дигитално следење на лекувањето во странство, а со ова поврзани се двојазичните обрасци бидејќи ние имаме договор со над 17 земји за лекување и третман на наши граѓани и нивни во Македонија. Ова право го користат студенти и наши граѓани на работа во странство, а се осигурени во Македонија – рече Клековски.
Најави дека се планира и комплетна дигитализација на боледувањата, особено на надомест за бременост, раѓање и родителство, вклучувајќи го породилно и за таткото.
– Ние нема да имаме подобри услуги за граѓаните и поголема контрола, без да се дигитализираат услугите. Дигитализацијата ќе овозможи многу заднински функции, ефикасност и за граѓаните, но и за институциите. Во врска со целата оваа податочна поврзаност е и подготовката за е-попис бидејќи веќе сме поврзани и најголем дел од институциите што би обезбедувале евентуално податоци за констатирање на состојбата за присуство и жителство – рече Клековски.
Директорот на Фондот додаде и дека со вкрстување бази на податоци ќе се спречат какви било злоупотреби, но и ќе се овозможи остварување на правата на граѓаните.