Макрон: Доколку суверенитетот на сојузниците биде загрозен, последиците би биле без преседан

Доколку суверенитетот на една европска земја и нејзините сојузници биде загрозен, последиците би биле без преседан, изјави денеска францускиот претседател Емануел Макрон на состанокот на кабинетот, алудирајќи на напорите на американскиот претседател Доналд Трамп да ја преземе контролата врз арктичката територија.

„Не ги потценуваме изјавите за Гренланд“, рече Макрон, цитиран од портпаролката на владата Мод Брежон.

„Доколку суверенитетот на една европска земја и нејзините сојузници биде загрозен, последиците би биле без преседан. Франција многу внимателно ја следи ситуацијата и ќе дејствува во целосна солидарност со Данска и нејзиниот суверенитет“, додаде тој.

Порано во текот на денот, претседателката на Европската комисија, Урсула фон дер Лајен, изјави дека постои силна врска меѓу ЕУ и Гренланд и дека жителите на Гренланд можат да сметаат на поддршката од ЕУ.

Шефовите на дипломатиите на Данска и Гренланд доцна вечерва ќе се сретнат во Белата куќа со потпретседателот на САД Џ.Д. Венс по неколкунеделните закани од претседателот Доналд Трамп против Гренланд, автономна територија во рамките на Данска.