Франција во новата 2026 година влегува без усвоен буџет

Француските пратеници задолжени да најдат компромис за националниот буџет за 2026 година не успеаја да постигнат договор, што речиси сигурно значи дека Франција ќе влезе во новата година без усвоен фискален план за следните 12 месеци.

Седум пратеници од двата дома на француското законодавно тело се состанаа во заеднички комитет во петокот за да бараат консензус, но брзо стана јасно дека нема да има договор.

Во соопштението, премиерот Себастијан Лекорну потврди дека Франција сега ќе ја заврши годината без соодветен државен буџет и дека ќе се сретне со пратениците во понеделник за да најде начин за напредување.

Во ноември, Лекорну предупреди дека неуспехот да се усвои буџетот пред крајот на годината би претставувал опасност за француската економија. Пазарите ја следат ситуацијата во Франција со загриженост поради стравувањата дека земјата станала премногу нефункционална за да ги балансира јавните финансии.

„Жалам за недостатокот на волја кај одредени пратеници да постигнат договор, од што, за жал, се плашевме во изминатите денови“, рече Лекорну.

Пратениците сега ќе се свртат кон усвојување на привремена мерка што би го пренела буџетот за 2025 година во следната година, а потоа ќе се вратат на работа на конечниот буџет за 2026 година во новата година.

Иако ова привремено решение ќе спречи затворање на државните институции според американскиот модел, тоа нема да придонесе за намалување на буџетскиот дефицит, кој се проценува на 5,4 проценти од бруто домашниот производ оваа година.

Во октомври, Лекорну изјави дека буџетскиот дефицит за 2026 година не треба да надминува 5 проценти од БДП.

Франсоа Вилерој де Гало, гувернер на Банката на Франција, во интервју за „Фигаро“, објавено во петок, изјави дека земјата мора да го одржи дефицитот под тој праг од пет проценти за да обезбеди идно фискално здравје.

„Со дефицит од над 5 проценти, Франција очигледно би се довела во опасност. Секоја година околу 7 милијарди евра повеќе одат за камата на долгот, кој во текот на десет години изнесува 70 милијарди евра што повеќе ги немаме на располагање за инвестиции во образование, безбедност или дигитални технологии“, рече тој.