Уставниот суд на Тајланд ја суспендира од должноста премиерката Шинаватра

Уставниот суд на Тајланд денеска ја суспендираше премиерката Паетонгтарн Шинаватра од функцијата поради прекршување на етичките правила и истрага за нејзиниот телефонски разговор со највисокиот функционер на Камбоџа околу граничен спор.

Судиите едногласно ја прогласија за виновна за прекршување на етичките правила, при што седум од 12-те судии гласаа за нејзино суспендирање. Премиерката има 15 дена да презентира докази во своја одбрана.

Паетонгтарн се соочува со растечко незадоволство поради нејзиното справување со неодамнешниот граничен спор со Камбоџа, кој прерасна во вооружен конфликт на 28 мај и во кој загина еден камбоџански војник.

По протекувањето на нејзиниот телефонски повик околу спорот, имаше низа жалби и јавни протести.

Коментарите на премиерката за истакнат регионален воен командант и нејзините обиди да го смири претседателот на Сенатот на Камбоџа за ублажување на тензиите на границата предизвикаа најголемо негодување.

Илјадници конзервативни, националистички демонстранти се собраа во центарот на главниот град во саботата за да побараат оставка од премиерката.

Таа сè уште не ја коментирала одлуката на судот. Премиерката вчера изјави дека ќе го прифати судскиот процес, иако рече дека не сака нејзините активности на функцијата да бидат прекинати.

Се очекува нејзиниот заменик, Сурија Јунгрунгруангкит, да ја преземе функцијата по суспензијата на премиерката, иако ова сè уште не е официјално потврдено. Сурија моментално е министер за транспорт.

Кралот Маха Ваџиралонгкорн одобри реконструкција на кабинетот претходно во текот на денот откако водечката партија ја напушти коалициската влада на премиерката поради скандалот со телефонски повик.

Реконструкцијата на кабинетот вклучуваше замена на поранешниот заменик-премиер Анутин Чарвиракул, лидер на партијата Бхумџаитаи, чии членови имаа неколку министерски функции.

Паетонгтарн, покрај улогата на премиер, ја презеде и улогата на министер за култура, велејќи дека сака да го промовира Тајланд во таа област на глобално ниво.

Таа е исто така под истрага на Комисијата за борба против корупцијата за наводни прекршувања на етичките правила, одлука што може да доведе и до нејзино отстранување. Уставниот суд ја отстрани нејзината претходничка од функцијата минатата година, исто така поради прекршување на етичките правила. Судовите во Тајланд, а особено Уставниот суд, се сметаат за темел на ројалистичкиот систем.