Седум од десет Грци сметаат дека Владата се обидува да ги прикрие причините за железничката несреќа кај Темпи

Седум од десет анкетирани (69,8 отсто) сметаат дека грчката Влада се обидува да ги прикрие причините за железничката несреќа кај Темпи пред две години во која загинаа 57 лица, а исто толку (70,7 проценти) сметаат дека опозициските партии се обидуваат политички да ја искористат трагедијата, покажуваат резултатите од истражувањето на јавното мислење на агенцијата „MARC“ за телевизијата „Антена“, јави дописничката на МИА од Атина.

Во однос на реконструкцијата на Владата што пред 20 дена ја направи грчкиот премиер Кирјакос Мицотакис, 60,8 отсто сметаат дека промените нема (46,3 проценти) или веројатно нема (14,5 отсто) да донесат подобрување на работата на Владата.

На политичката сцена, Нова демократија е прва со 26,5 отсто, на второ место, како и на речиси сите истражувања од изминатиот период е левичарската Курс на слободата со 13,7 проценти, ПАСОК е трета со 11,1 отсто, а потоа следат грчкото решение, СИРИЗА и Комунистичката партија.

Истражувањето на јавното мислење на агенцијата „MARC“ за телевизијата „Антена“, било спроведено од 27 март до 1 април со анкетирани 1.139 лица.