СДСМ: Непотизам во Владата – Андоновски министер, таткото советник, братот началник
„Значи едниот син министер во Владата на Мицкоски, другиот началник во АНБ а таткото Советник во Влада. Ова е класичен пример на непотизам и судир на интереси. Ова е срам и навреда за граѓаните“, изјави портпаролката на СДСМ, Богданка Кузеска.
Најголемата опозициска партија обвини за непотизам во Владата на Мицкоски.
„Безочно и бес осет, континуирано се назначуваат роднини на функционерите на ВМРО-ДПМНЕ, се вработуваат под државна капа, на грбот на граѓаните. Последен е скандалозниот случај со Љупчо Андоновски, татко на министерот за дигитална трансформација во Владата – Стефан Андоновски.
Таткото на министерот Стефан, Мицкоски си го назначил за негов советник во Владата. Братот пак на министерот Стефан, Игор Андоновски, е назначен за началник на одделот на АНБ за град Скопје пред неколку месеци.
Значи едниот син министер во Владата на Мицкоски, другиот началник во АНБ а таткото Советник во Влада. Ова е класичен пример на непотизам и судир на интереси. Ова е срам и навреда за граѓаните“, изјави портпаролката на СДСМ, Богданка Кузеска.
Таа ја повика Државната комисија за спречување на корупцијата итно да отвори предмет и да постапи.
„Додека илјадници млади и способни луѓе заминуваат од државата во потрага по работа, високите позиции во институциите се резервирани исклучиво за роднините на сегашните и поранешните функционери на ДПМНЕ.
Нели ДПМНЕ ветуваше пред граѓаните дека ќе нема непотизам, дека ќе има департизација и дека нема со врски да се вработува. Епа еве, се погазија.
Ова уште еднаш ја покажува вистинската природа на оваа власт – наместо компетентност и заслуги, пресудни критериуми за добивање работа и функции се семејните и партиските врски, однос неспособноста“, рече Кузеска.